सोलापूरचे नाव राज्याच्या कानाकोपऱ्यात पोहोचविणाऱ्या ज्येष्ठ रंगकर्मी विद्या काळे यांना यंदाचा अस्तित्व मेकर फाउंडेशन आयोजित अस्तित्व रंग साधक पुरस्कार जाहीर करण्यात आला आहे. रोख रक्कम मानपत्र स्मृतिचिन्ह शाल आणि श्रीफळ असे पुरस्काराचे स्वरूप असून आठ ऑगस्ट रोजी सायंकाळी सात वाजता हुतात्मा स्मृती मंदिरात या पुरस्काराचे वितरण केले जाणार असल्याची माहिती ज्येष्ठ रंगकर्मी सुनील गुरव यांनी पत्रकार परिषदेत दिली
अस्तित्व मेकर्स फाउंडेशन, सोलापूर ही संस्था गेली १७ वर्षे सोलापूर शहर आणि जिल्ह्यात नाटक व नाट्यसंबंधित उपक्रम राबवत आहे. या उपक्रमांचा एक भाग म्हणून संस्था गेल्या १० वर्षांपासून प्रयोगशील रंगभूमीवर काम करणाऱ्या आणि नाटक जिवंत ठेवण्यासाठी सातत्याने प्रयत्न करणाऱ्या रंगकर्मींचा ‘अस्तित्व रंगसाधक पुरस्कार’ देऊन सन्मान करत आहे.
यंदाचे हे पुरस्काराचे अकरावे वर्ष आहे. विद्याताई काळे यांनी संगीत नाट्य आणि बालनाट्य क्षेत्रात गेली ४० वर्षांहून अधिक काळ त्यांनी दिलेल्या योगदानाचा गौरव म्हणून हा पुरस्कार प्रदान केला जाणार आहे.पुरस्काराचे स्वरूप मानपत्र, स्मृतिचिन्ह, शाल आणि श्रीफळ असे असणार आहे.या पत्रकार परिषदेस ॲड. बसवराज सलगार, अमोल धाबळे संजय सावंत, सचिन जगताप, सोहम खंडागळे, अश्फाक नदाफ उपस्थित होते.
