TOP 25 । गरज नसताना तब्बल 165 कोटी खर्चून केला रस्ता… सोलापूरकर गप्प..!

सोलापूर स्मार्ट सिटी डेव्हलपमेंट कंपनीने ज्या पद्धतीने गरज नसणारी कामे करून पैशाची उधळपट्टी केली त्याच पद्धतीने सोलापुरात एकाच रस्त्यासाठी तब्बल 165 कोटी रुपये खर्च केले जात आहेत. या रस्त्यावर एकही खड्डा नव्हता. दोन्हीही बाजूला फुटपात.. दुभाजक त्यामध्ये असलेली झाडी आणि विद्युत पोल… असा नजर लागणारा सुंदर रस्ता पूर्णपणे तोडफोड करून या ठिकाणी सिमेंटचा रस्ता केला जात आहे. होटगी रोड वरील महिला हॉस्पिटल ते जेऊर इंगळगी पर्यंत तब्बल 165 कोटी रुपये खर्च करून महाराष्ट्र इन्फ्रास्ट्रक्चर डेव्हलपमेंट कंपनीच्या माध्यमातून रस्ता सिमेंटचा केला जात आहे. रस्त्याची कोणत्याही प्रकारची रुंदी वाढविण्यात आली नाही. त्यामुळे फक्त सिमेंटचे थर वाढवून आणि पावसाळी गटार करून आजूबाजूच्या नागरिकांची घरे एक प्रकारे खड्ड्यात नेली आहेत. महापालिकेचे नगरसेवक अधिकारी आणि सोलापुरातील लोकप्रतिनिधी याबाबत काहीही बोलायला तयार नाहीत. स्मार्ट सिटी डेव्हलपमेंट कंपनीने डॉक्टर बाबासाहेब आंबेडकर चौक – डफरीन हॉस्पिटल -हरीभाई देवकर प्रशाला – ते रंगभवन या अत्यंत सुंदर असलेल्या रस्त्याची तोडफोड करून यावर 23 कोटी रुपयांची उधळपट्टी केली. त्याचप्रमाणे आता होटगी रोडवर रस्त्याचे काम सुरू आहे. साखर कारखाना, विमानतळ, तसेच भविष्यात होणारे आयटी पार्क हे याच रस्त्यावर असल्यामुळे चौपदरीकरण असलेला हा रस्ता किमान सहा पदरीकरण केला असता तरीही चांगले झाले असते. केवळ एका आमदाराच्या हट्टा पायी हे काम सुरू आहे हे दुर्दैव.