मान्सूनबाबत हवामान खात्याने महत्त्वाची माहिती जारी केली आहे. त्यानुसार पुढील 48 तासांमध्ये मान्सून मुंबईत प्रवेश करणार आहे. तर मान्सूनने पुण्यात प्रवेश केल्याचेही हवामान खात्याने जाहीर केले आहे. हवामान खात्याकडून वातावरणातील बदलाचा एक नकाशा प्रसिद्ध करण्यात आला आहे. त्यानुसार मान्सून रेषा अलिबाग, पुणे, निझामाबाद, दांतेवाडा, बलंगीर, सुंदरगड, गया आणि मुझफ्फरपूरपर्यंत पोहोचली आहे, अशी घोषणा भारतीय हवामान विभागाकडून करण्यात आली आहे.मागील आठवडाभर पुण्यासह राज्यातील अनेक भागांमध्ये तापमानात लक्षणीय वाढ झाली होती. पुण्यात तापमानाने जवळपास 40अंश सेल्सिअसचा टप्पा गाठल्याने नागरिक अक्षरशः होरपळून निघाले होते.मात्र काल रविवार दिनांक 21 ला मान्सूनच्या सरींनी पुणे आणि आसपासच्या परिसरात सुखद सरी बरसल्या.यामुळे शेतकऱ्यांसह नागरिकांमध्ये उत्साहाचे आणि आनंदाचे वातावरण आहे . दरम्यान 22 ते 27 जूनदरम्यान कोकण, मध्य महाराष्ट्रात मुसळधार पावसाचा इशारा देण्यात आला आहे.
शहरासह उपनगरांत सायंकाळी साडेपाच वाजेपर्यंत झालेला पाऊस:-
एनडीए 79, खडकवासला 57, वारजे 25, शिवाजीनगर 19, आंबेगाव- कात्रज 11, हडपसर 9 , डेक्कन 8 मिमी पावसाची नोंद झाली.
