सोलापूर : भारतीय जनता पार्टी सोलापूर शहर प्रभाग क्रमांक २६ आणि शि. प्र. मंडळ, कुमठे यांच्या संयुक्त विद्यमाने एस.पी.एम. पॉलिटेक्निक, कुमठे येथे आंतरराष्ट्रीय योग दिन उत्साहात साजरा करण्यात आला. या कार्यक्रमास पतंजली योग समितीच्या योग शिक्षिका मंगल गायकवाड, निलीमा मोंढे, आशा जेधे व कु. तन्वी निंबाळकर यांनी उपस्थित राहून विविध योग प्रात्यक्षिके सादर केली. तसेच विद्यार्थ्यांना योगाचे दैनंदिन जीवनातील महत्त्व समजावून सांगितले.
कार्यक्रमाचे प्रास्ताविक संस्थेचे मुख्य विश्वस्त तथा नगरसेवक जयकुमार माने यांनी केले. यावेळी त्यांनी योग हा मानवी जीवनाचा अविभाज्य घटक असल्याचे सांगत, केवळ योग दिनापुरता मर्यादित न राहता प्रत्येकाने आपल्या दैनंदिन जीवनात योगाचा अंगीकार करावा, असे आवाहन केले.याप्रसंगी व्यासपीठावर विश्वस्त स्वाती माने, ब्रह्मदेवदादा माने बँकेचे संचालक सचिन चौधरी, एस.पी.एमच्या प्राचार्या रोहिणी चव्हाण, माध्यमिक प्रशालेचे अंबादास रेडे सर, आदर्श बालविकासच्या जमखंडीकर मॅडम, पर्यवेक्षक क्षीरसागर सर, लिटिल स्टारचे समन्वयक मलकारी कोरे आदी मान्यवर उपस्थित होते.
योग शिक्षिका मंगल गायकवाड यांनी विविध योगासने, प्राणायाम व योगाभ्यासाचे प्रात्यक्षिक सादर करून विद्यार्थ्यांना निरोगी जीवनासाठी योगाचे महत्त्व पटवून दिले. कार्यक्रमास विद्यार्थी, शिक्षक व कर्मचारी यांचा उत्स्फूर्त सहभाग लाभला. योग दिनाच्या माध्यमातून निरोगी जीवनशैलीचा संदेश देत कार्यक्रमाची सांगता करण्यात आली. सूत्रसंचालन प्रा ज्ञानेश्वर जाधव तर आभार विजयसिंह क्षीरसागर यांनी मानले.
