TOP 25 । गोकुळ शुगर ने जनता बँकेचे 37 कोटींचे कर्ज थकविले, कर्जदार आणि जामीनदाराची मालमत्ता जप्त…

दक्षिण सोलापूर तालुक्यातील धोत्री येथील शिंदे कुटुंबीयांच्या मालकीच्या गोकुळ शुगर ने ज्याप्रमाणे शेतकऱ्यांच्या ऊस बिलाच्या रकमा थकविल्या, त्याचप्रमाणे विविध बँकेची तसेच वित्तीय संस्थांची सुमारे 420 कोटी रुपयांची कर्जे देखील थकवली आहेत. यामध्ये युनियन बँकेचे कर्ज सुमारे 130 कोटी रुपयांचे कर्ज थकले आहे. आता धाराशिवच्या जनता सहकारी बँकेचे कर्ज देखील थकल्याचे स्पष्ट झाले आहे. जनता बँकेने जाहीर प्रसिद्धीकरण करून सुरक्षित तारण कर्जदार आणि जामीनदार यांच्या मालमत्तेचे विवरण प्रसिद्ध केले आहे. यामध्ये कैलासवासी बलभीम शिंदे यांचे कायदेशीर वारसदार , अरविंद जंगले, विशाल शिंदे, कार्तिक पाटील, गणपत शिंदे, कुसुम शिंदे, कल्पना शिंदे,धीरज शिंदे, निकिता शिंदे व्यंकट मोरे, तसेच सोलापुरातील युवा कलेक्शन या दुकानाचे भागीदार कपिल, दत्ता आणि प्रीती शिंदे यांच्या नेहरूनगर, रेल्वे लाईन, दहिटणे,अक्कलकोट, चपळगाव, आदी ठिकाणी असलेल्या स्थावर आणि जंगम मालमत्ता बँकेने जप्त केल्या आहेत. या थकबाकी धाराविरुद्ध आता सोलापूर दिवाणी न्यायालयात दरखास्तीची प्रक्रिया सुरू आहे. वृत्तपत्रातून देण्यात आलेल्या नोटीसीनुसार जनता सहकारी बँक धाराशिव, शाखा दत्त चौक सोलापूर दत्त चौक मधील एकूण 36 कोटी 71 लाख कर्ज थकल्याचे नमूद केले आहे. त्यामुळे गोकुळ शुगर आणि दत्ता शिंदे कुटुंबीयां च्या अडचणी अधिकच वाढल्या आहेत.