सोलापूर – सामाजिक न्याय व विशेष सहाय्य विभाग शासन निर्णय दिनांक 20 नोव्हेंबर 2025 अन्वये ॲट्रॉसिटी अधिनियमांतर्गत खून व मृत्यू झालेल्या पीडितांच्या वारसांना शासकीय नोकरी देण्याची कार्यपद्धती विहित करण्यात आली आहे. त्यानुसार सोलापूर जिल्ह्यातील प्रलंबित प्रकरणांवर कार्यवाही करण्यात येत आहे.
दिवंगत दत्ता लक्ष्मण खंदारे यांचा खून झाल्याने अक्कलकोट एमआयडीसी पोलीस स्टेशन मध्ये गुन्हा रजिस्टर क्रमांक 926/2020 अन्वये नोंद करण्यात आली आहे. सदर गुन्ह्याची नोंद अनुसूचित जाती व जमाती अत्याचार प्रतिबंधक अधिनियम अंतर्गत करण्यात आलेली आहे. या प्रकरणी पात्र वारसदारांचा शोध घेण्यात येत आहे; मात्र चौकशीनुसार वारसदारांची माहिती प्राप्त झालेली नाही.
त्यामुळे दिवंगत दत्ता लक्ष्मण खंदारे यांची पत्नी, अपत्य वा अन्य कायदेशीर वारसदार असल्यास त्यांनी या जाहीर प्रकटनाच्या प्रसिध्दीपासून 15 दिवसांच्या आत सहाय्यक आयुक्त, समाज कल्याण कार्यालय, डॉ. बाबासाहेब आंबेडकर सामाजिक न्याय भवन, तिसरा मजला, सात रस्ता, सोलापूर या कार्यालयास संपर्क साधून आपले वारसत्व सिद्ध करणारी कागदपत्रे सादर करावीत. यात वारस प्रमाणपत्र, आधार कार्ड, जन्म दाखला, रेशन कार्ड तसेच इतर संबंधित पुरावे यांचा समावेश असावा.
निर्धारित मुदतीत कोणतीही हरकत, दावा अथवा वारसत्वाबाबतची माहिती प्राप्त न झाल्यास उपलब्ध अभिलेखांच्या आधारे पुढील कार्यवाही करण्यात येईल. त्याबाबत नंतर करण्यात येणारे कोणतेही दावे किंवा हरकती विचारात घेतल्या जाणार नाहीत, अशी माहिती सहाय्यक आयुक्त, समाज कल्याण सुलोचना सोनवणे यांनी दिली आहे.
