लातूर- बसवकल्याण क्षेत्र समिती महाराष्ट्र राज्य कार्यकारिणीची महत्त्वपूर्ण बैठक महात्मा बसवेश्वर महाविद्यालय, लातूर येथे उत्साहपूर्ण वातावरणात संपन्न झाली. बैठकीच्या अध्यक्षस्थानी महाराष्ट्र राज्याचे प्रभारी डॉ. अमरनाथ सोलपुरे होते. प्रमुख पाहुणे मराठवाडा शिक्षक संघटनेचे नेते सूर्यकांत विश्वासराव व समितीचे प्रदेश अध्यक्ष मा. माधवराव पाटील टाकळीकर, प्रदेश उपाध्यक्ष विजयकुमार हत्तुरे ,प्रदेश सचिव प्राध्यापक शेषराव शेटे, प्रा. आनंद कर्णे,प्रा.सुनील हिंगणे,प्रा.राजेश विभुते, महिला प्रदेशाध्यक्ष उषा रोडगे,पत्रिके मॅडम आदी मान्यवर उपस्थित होते.
बैठकीत महाराष्ट्रातील विविध जिल्ह्यांतील प्रतिनिधींनी सहभाग घेतला. राज्यभरातील जिल्हाध्यक्ष व जिल्हा कार्यकारिणीच्या नियुक्तीबाबत सविस्तर चर्चा करण्यात आली. तसेच बसवकल्याण क्षेत्र समितीचे कार्य समाजातील सर्व स्तरांपर्यंत प्रभावीपणे पोहोचविण्यासाठी विविध उपक्रम राबविण्याचा निर्णय घेण्यात आला.
बैठकीत महाराष्ट्रातील प्रत्येक जिल्ह्यात समाजभावना जपणाऱ्या कार्यकर्त्यांना संघटनेशी जोडण्यावर भर देण्यात आला. तसेच दि. 23 ते 27 डिसेंबर 2027 दरम्यान बसवकल्याण येथे आयोजित करण्यात येणाऱ्या ऐतिहासिक इष्टलिंग दीक्षा महोत्सवात महाराष्ट्रातून एक लाख शरणांचा सहभाग सुनिश्चित करण्यासाठी जिल्हानिहाय नियोजन करण्याचा निर्धार व्यक्त करण्यात आला.
यावेळी बसवकल्याण क्षेत्र समितीचे महाराष्ट्र राज्य कार्यालय लातूर येथे स्थापन करण्याबाबत सकारात्मक चर्चा झाली. महाराष्ट्रासाठी स्वतंत्र माहितीपत्रक तयार करण्यासंदर्भात विविध सूचना व प्रस्ताव मांडण्यात आले.
बैठकीत उपस्थित पदाधिकाऱ्यांनी संघटन विस्तार, समाजप्रबोधन, युवक सहभाग आणि आगामी कार्यक्रमांच्या यशस्वी आयोजनाबाबत आपापली मते मांडली. सर्व विषयांवर सखोल चर्चा करून महत्त्वपूर्ण निर्णय घेण्यात आले.
या बैठकीस काशिनाथ भतकुणकी,नामदेव फुलारे ,आत्मलिंग शेटे परळी, शिवाजीराव भालेराव ,महेश पाटील, बसवेश्वर हेंगणे,लक्ष्मण मुकडे आप्पा,दिगंबर भालके, योगेश स्वामी, वीरांन्ना पावले भावना अवचले मॅडम, राजकुमार खोबरे सह राज्यातील विविध जिल्ह्यांतील पदाधिकारी व कार्यकर्ते मोठ्या संख्येने उपस्थित होते.
