सोलापूर : लोकमंगल को-ऑपरेटिव्ह बँक लिमिटेडच्या डिजिटल प्रगतीच्या वाटचालीत आणखी एक महत्त्वपूर्ण टप्पा गाठत बँकेच्या अत्याधुनिक व अद्ययावत डेटा सेंटरचे उद्घाटन बँकेचे अध्यक्ष तथा दक्षिण सोलापूरचे आमदार मा. सुभाष देशमुख यांच्या शुभहस्ते उत्साहपूर्ण वातावरणात संपन्न झाले.
ग्राहकांना अधिक जलद, सुरक्षित, विश्वासार्ह व अखंडित बँकिंग सेवा उपलब्ध करून देण्याच्या उद्देशाने हे अत्याधुनिक डेटा सेंटर उभारण्यात आले आहे. आधुनिक तंत्रज्ञानाने सुसज्ज असलेल्या या डेटा सेंटरमुळे बँकेच्या डिजिटल सेवा अधिक सक्षम होणार असून व्यवहारांची गती, सुरक्षितता आणि कार्यक्षमता यामध्ये लक्षणीय वाढ होणार आहे. तसेच भविष्यातील वाढत्या डिजिटल गरजा पूर्ण करण्यासाठीही हे सेंटर महत्त्वाची भूमिका बजावणार आहे.
यावेळी बँकेचे संचालक देवानंद चिलवंत, सतीश लामकाने, जॉन चोप्रा, अनंता चव्हाण, निलेश पटेल, अभिजीत टाकळीकर, विजय कुलकर्णी, सिद्धार्थ सर्जे, जितेंद्र नाईक, प्रल्हाद कांबळे, अशोक सापटणेकर, , उज्वला चेळेकर, तज्ञ संचालक डॉ. नरेंद्र काटीकर, सीए सौरभ अंबुरे तसेच मुख्य कार्यकारी अधिकारी राजेशसिंह बायस यांची प्रमुख उपस्थिती होती.
लोकमंगल को-ऑप बँक ही आधुनिक तंत्रज्ञानाचा अवलंब करत ग्राहककेंद्री सेवा अधिक सक्षम करण्यासाठी सातत्याने प्रयत्नशील असून, या डेटा सेंटरच्या माध्यमातून बँकेच्या डिजिटल परिवर्तनाला नवी दिशा मिळणार असल्याचा विश्वास यावेळी व्यक्त करण्यात आला.
