सोलापूर महानगरपालिका हद्दीत समाविष्ट झालेल्या १२ गावांतील मिळकतधारकांना मालमत्ता पत्रक उपलब्ध करून देण्यासाठी यापूर्वी महानगरपालिकेकडून 5.00 कोटी रुपये नगरभूमापन विभागाकडे भरणा करण्यात आलेला आहे. या अनुषंगाने सदर विभागाकडून झालेल्या तसेच यापुढील काळात महाराष्ट्र शासनाच्या भूमी अभिलेख विभागामार्फत नगरभूमापन मोजणी कामकाजाकरीता मॅपेक्स नावाची एजन्सी नियुक्त करण्यात आलेली आहे.
या पार्श्वभूमीवर आज सोलापूर महानगरपालिकेच्या कॉन्सिल हॉल येथे महापौर विनायक दादा कोंड्याल यांच्या अध्यक्षतेखाली आढावा बैठक आयोजित करण्यात आली.यावेळी उपमाहापौर ज्ञानेश्वरी देवकर, सभागृह नेते नरेंद्रजी काळे, स्थयी समिती सभापती रंजीता चाकोते, आयुक्त डॉ. सचिन ओम्बासे, अधिक्षक भूमी अभिलेख दादासाहेब घोडके, उपअधिक्षक भूमी अभिलेख सचिन पवार, मॅपेक्सचे सचिन कांबळे, नगररचना कार्यालयाकडील सहायक संचालक नगर रचना समीर शितोळे, कार्यकारी अभियंता नीलकंठ मठपती, उपअभियंता जोशी, यांच्या सह नगरसेवक, नगरसेविका उपस्थिती होते.
यावेळी सदर सादरीकरणाबाबत प्रस्तावना शकील शेख यांनी सादर केली तदनंतर उपअधिक्षक सचिन पवार यांनी सदर प्रक्रियेची सविस्तर माहिती देणारे सादरीकरण केले. या सादरीकरणामध्ये सर्वेक्षणाची उद्दिष्टे, नागरिकांना होणारे फायदे, आवश्यक ती लागणारी कागदपत्रे पुढील कार्यपद्धती याबाबत माहिती दिली. महानगरपालिका हद्दीत समाविष्ट झालेल्या १२ गावांमध्ये अत्याधुनिक ड्रोन व GIS तंत्रज्ञानाच्या सहाय्याने अचूक सर्वेक्षण करण्यात येत असून डिजिटल नकाशे तयार केले जात आहेत. या मोहिमेमुळे नागरिकांना ऑनलाइन मालमत्ता पत्रक उपलब्ध होणार असून मालमत्तेशी संबंधित वाद कमी होण्यास मदत होणार आहे. तसेच मालमत्ता धारकांना प्रॉपर्टी कार्ड व सनद प्राप्त झाल्यानंतर बँक कर्ज, आर्थिक व्यवहार आणि विविध शासकीय योजनांचा लाभ घेणे अधिक सुलभ होणार आहे. नगरभूमापन मोहिमेअंतर्गत संबंधित मिळकतधारकांनी आवश्यक कागदपत्रे सादर करणे आवश्यक आहे. यामध्ये अधिकार अभिलेख (७/१२), महानगरपालिका कर पावती, खरेदीखत (Sale Deed), सक्षम प्राधिकाऱ्यांचे आदेश, मान्य अभिहस्तांतरण (Deemed Conveyance), घोषणापत्र, सोसायटी नोंदणी प्रमाणपत्र, बांधकाम मंजुरी नकाशा, वारसा हक्क प्रमाणपत्र, वीज बिल, पाणीपट्टी, आधार कार्ड आदी कागदपत्रांचा समावेश आहे.
महापौर विनायक दादा कोंड्याल यांनी नागरिकांना आवाहन करताना सांगितले की, “नगरभूमापन ही नागरिकांच्या मालमत्ता हक्कांना अधिकृत स्वरूप देणारी महत्त्वाची मोहीम आहे. सदर प्रभागातील नगरसेवकांनी त्यांचे प्रभागातील मिळकतदार व नगरभूमापन कडील कर्मचारी यांचेमध्ये समन्वय साधुन सदरचे मोजणी कार्यवाहीचे अनुषंगाने मिळकतीचे प्रॉपर्टी कार्ड मिळविण्यासाठी सहकार्य करावे. नागरिकांच्या सहभागामुळे ही मोहीम यशस्वी होईल. सदरचे कामकाज नगरभूमापन विभागाने मनुष्यबळ वाढवून विहीत कालमर्यादेमध्ये पूर्ण करावेत अशा सूचना दिल्या. सदर प्रसंगी नगरसेवक प्रशांत पल्ली, . शिवानंद पाटील, नारायण बनसोडे, अनंत जाधव, नगरसेविका अर्चना वडनाल यांनी देखील सूचना केल्या. सदर सादरीकरणानंतर मा. आयुक्त डॉ. सचिन ओम्बासे यांनी नगरभूमापन विभागास सदर कामकाजाकरीता महानगरपालिकेकडून नगररचना व मालमत्ता विभागाकडून समन्वय अधिकारी उपलब्ध करुन दिले जातील असे सांगून सदरची मोजणीची कार्यवाही यशस्वीरित्या पार पाडणेबाबत सूचना दिल्या. यानंतर सदरची बैठक संपन्न झाली.
