आदीला नदीमध्ये सिमेंट पाईप टाकून केला रस्ता, महापालिकेने दाखल केला गुन्हा…!

सोलापूर शहरातील बाळे परिसरात तसेच वसंत विहार गुलमोहर सोसायटी या परिसरातून वाहणाऱ्या आदीला नदीच्या भोवती होणारी अतिक्रमणे तसेच आदिला नदीच्या मध्ये सिमेंट पाईप टाकून रस्ता केल्या प्रकरणाची गंभीर दखल आयुक्तांनी घेतली आहे. जेसीबी बोलवून तातडीने ते स्ट्रक्चर उध्वस्त करा आणि गुन्हा दाखल करा असे आदेश आयुक्त सचिन ओंबासे यांनी महापालिका झोन क्रमांक एक च्या अधिकारी सुनीता हीबारे यांना दिले होते. आयुक्तांच्या आदेशानुसार आपत्ती व्यवस्थापन कायद्यानुसार या आदीला नदीवर गुलमोहर नाला तसेच आदीला नदी या ठिकाणी सिमेंट पाईप टाकून रस्ता केल्याप्रकरणी सुनीता हीबारे यांनी दिलेल्या फिर्यादीनुसार उमा नगरी येथे राहणाऱ्या श्रीमंत रामचंद्र जाधव यांच्या विरोधात फौजदार चावडी पोलीस ठाण्यात गुन्हा दाखल करण्यात आला आहे. त्यामुळे आदीला नदी तसेच सोलापूर शहरातील नैसर्गिक नाल्याच्या कडेला ज्यांनी अतिक्रमणे केली त्यांचे धाबे दणाणले आहेत. महापालिकेतील टाऊन प्लॅनिंग तसेच बांधकाम विभागातील अनेक अधिकाऱ्यांनी अशा ठिकाणची लेआउट मंजूर केले . त्यांच्यावर कारवाई करण्याची मागणी आता जोर धरू लागली आहे.