राष्ट्रीय स्वयंसेवक संघाच्या तृतीय संघ शिक्षा वर्गाचा सोलापुरात शुभारंभ
राष्ट्रीय स्वयंसेवक संघाच्या पश्चिम महाराष्ट्र प्रांताच्या वतीने सोलापुरातील हरिभाई देवकरण प्रशालेत आयोजित करण्यात आलेल्या तृतीय संघ शिक्षा वर्गाचा आज शुभारंभ महापौर विनायक कोंड्याल यांच्या उपस्थितीत संपन्न झाला. भारत मातेच्या पूजनाने कार्यक्रमाची सुरुवात करण्यात आली.
यावेळी राष्ट्रीय स्वयंसेवक संघाचे पश्चिम महाराष्ट्र प्रांत सहकार्यवाह सचिन कुलकर्णी यांनी स्वयंसेवकांना मार्गदर्शन करताना, “देशाला परमवैभवाकडे नेणारा कार्यकर्ता घडवण्याचे ठिकाण म्हणजे संघ शिक्षा वर्ग” असे प्रतिपादन केले. संघाच्या वैचारिक अधिष्ठानातून समाजपरिवर्तन घडवणारे कार्यकर्ते तयार होतात, असेही त्यांनी सांगितले.
या प्रसंगी पश्चिम महाराष्ट्र प्रांताचे संघचालक सुरेश जाधव, वर्गाचे सर्वाधिकारी शशिकांत फिरंगे यांच्यासह विविध मान्यवर उपस्थित होते.
महापौर विनायक कोंड्याल यांनी मनोगत व्यक्त करताना सांगितले की, “संघ विचारांचा माझ्यावर लहानपणापासून प्रभाव आहे. राष्ट्रप्रेम, संस्कार आणि समाजकार्याची प्रेरणा संघाच्या विचारांतून मिळते. या वर्गाच्या उद्घाटक म्हणून उपस्थित राहण्याची संधी मिळणे हे माझे भाग्य आहे. सोलापूरच्या सर्वांगीण विकासासाठी संघाचे मार्गदर्शन घेत राहणार.”
सलग १५ दिवस चालणाऱ्या या संघ शिक्षा वर्गात स्वयंसेवकांना मोबाईल विरहित वातावरणात शारीरिक, बौद्धिक, सेवाव्रत, सामाजिक समरसता तसेच वेळेचे व्यवस्थापन आदी विविध विषयांचे प्रशिक्षण दिले जाणार आहे.
