मुख्यमंत्र्यांनी सोलापूरकरांना पुन्हा केलं ‘खुश’..!

मुख्यमंत्री देवेंद्र फडणवीस यांचा आजचा भर दुपारी सोलापूरच्या रणरणत्या उन्हात झालेला विजयी मेळावा लक्षणीय ठरला. सोलापूरचे आयटी पार्क मार्गी लावू,…उड्डाणपूला संदर्भात पंधरा दिवसात केंद्रात बैठक लावू, सोलापूरला नाईट लँडिंग ची सुविधा उपलब्ध करून नवीन मुंबई एअरपोर्टवर सकाळचा स्लॉट उपलब्ध देऊ.. बसवेश्वर स्मारक उभा करू…सोलापूरला रेडीमेड गारमेंट हब करू… सोलापूरचे इंजिनिअरिंग कॉलेज या वर्षीपासूनच सुरू करू तसेच पंढरपुरात सर्वात महत्त्वकांक्षी असा कॉरिडॉर उभा करून जिल्ह्यातील धार्मिक पर्यटनाला चालना देऊ… अशी एकाहून एक आश्वासने देत मुख्यमंत्री देवेंद्र फडणवीस यांनी सोलापूरकरांना पुन्हा खुश केले. महापालिका, जिल्हा परिषद, तसेच पंचायत समिती मधील 359 सदस्यांचा सत्कार मुख्यमंत्री देवेंद्र फडणवीस यांच्या हस्ते करण्यात आला. यावेळी हरीभाई देवकरण प्रशालेच्या मैदानावर आयोजित केलेल्या विजयी मेळाव्यात प्रसंगी मुख्यमंत्री देवेंद्र फडणवीस बोलत होते. यावेळी व्यासपीठावर पालकमंत्री जयकुमार गोरे, आमदार सचिन कल्याणशेट्टी, आमदार सुभाष देशमुख, आमदार विजयकुमार देशमुख,आमदार देवेंद्र कोठे, महापौर विनायक कोंड्याल, यांच्यासह महापालिकेचे पदाधिकारी उपस्थित होते.