सोलापूर महानगरपालिका दहा हजार मिळकतींचा घेणार शोध

सोलापूर महानगरपालिकेच्या मालमत्ता कर विभागाकडून शहर तसेच हद्दवाढ भागामधील नव्याने बांधण्यात आलेल्या इमारती, अपार्टमेंटमधील सदनिका व गाळे, व्यावसायिक मिळकती तसेच खुले प्लॉट यांचा शोध घेऊन त्यांच्यावर कर आकारणी करण्यासाठी विशेष सर्वेक्षण मोहिम हाती घेण्यात आलेली आहे. या मोहिमेअंतर्गत शहरातील एकूण 50 पेठांमध्ये कार्यरत असलेल्या कर निरीक्षक व वसुली लिपिक यांना एप्रिल महिन्यासाठी सुमारे 10,000 नवीन मिळकतींचा शोध घेऊन त्यांची कर आकारणी करण्याचे उद्दिष्ट निश्चित करण्यात आले आहे. या माध्यमातून कर जाळ्यात नव्याने मिळकतींचा समावेश करून महानगरपालिकेच्या महसूलात वाढ करण्यावर भर देण्यात येत आहे.
तसेच, कर निरीक्षक व वसुली लिपिक यांना देण्यात आलेल्या उद्दिष्टांच्या अनुषंगाने झालेले कामकाज, नवीन मिळकतींचा शोध, तसेच दैनंदिन मालमत्ता कर वसुली यांचा सविस्तर आढावा घेण्यासाठी दर 15 दिवसांनी होणाऱ्या वॉर्ड समितीच्या बैठकीमध्ये संबंधित सदस्यांकडून नियमितपणे परीक्षण करण्यात येणार आहे. यामुळे कामकाजात पारदर्शकता येऊन कर वसुली प्रक्रियेला अधिक गती मिळणार आहे. महानगरपालिकेच्या वतीने नागरिकांना आवाहन करण्यात येते की, नव्याने बांधलेल्या किंवा अद्याप कर आकारणी न झालेल्या मिळकतींबाबत अचूक माहिती देऊन प्रशासनाला सहकार्य करावे, जेणेकरून शहराच्या विकासासाठी आवश्यक महसूल वाढविणे शक्य होईल.