प्रिसिजन फाऊंडेशनच्या अध्यक्षा डॉ. सुहासिनी शहा प्रमुख पाहुण्या
सोलापूर – राज्य राखीव पोलिस बल, गट क्र. १०, सोलापूर यांच्या कवायत मैदानावर महाराष्ट्र राज्य सुरक्षा महामंडळाच्या सत्र क्रमांक ७२ मधील २४२ महिला सुरक्षा रक्षकांचा दिक्षांत संचलन सोहळा उत्साहपूर्ण वातावरणात पार पडला. या कार्यक्रमाला प्रिसिजन फाऊंडेशनच्या अध्यक्षा डॉ. सुहासिनी शहा प्रमुख पाहुण्या म्हणून उपस्थित होत्या.कार्यक्रमाच्या प्रारंभी राज्य राखीव पोलिस दल गट क्र. १० च्या समादेशक डॉ. दीपाली काळे यांनी प्रास्ताविक केले. त्या म्हणाल्या की,आजचा हा दीक्षांत सोहळा केवळ एका प्रशिक्षणाची सांगता नसून स्त्रीशक्तीच्या सामर्थ्याचा आणि ध्येयवादाचा नवा आविष्कार आहे. शिस्त, कष्ट आणि जिद्दीच्या जोरावर २४२ महिला प्रशिक्षणार्थींनी आपले खडतर प्रशिक्षण यशस्वीरीत्या पूर्ण केले आहे.
प्रमुख पाहुण्या म्हणून मार्गदर्शन करताना डॉ. सुहासिनी शहा यांनी महिला प्रशिक्षणार्थींच्या शिस्तबद्ध संचलनाचे कौतुक केले. त्या म्हणाल्या, “या मैदानावर तुमचे शिस्तबद्ध संचलन आणि तुमच्या डोळ्यांतील आत्मविश्वास पाहून मला मनापासून अभिमान वाटतो. २४२ महिला प्रशिक्षणार्थींची ही तुकडी पाहताना मला केवळ गणवेशातील सुरक्षा रक्षक दिसत नाहीत, तर भारताच्या सक्षम आणि आत्मनिर्भर स्त्रीशक्तीचे दर्शन घडते.”त्या पुढे म्हणाल्या की, गणवेश धारण करणे ही केवळ नोकरी नसून समाजाप्रती असलेली मोठी जबाबदारी आहे. नागरिकांना सुरक्षिततेची भावना देणे, विशेषतः महिला व बालकांच्या सुरक्षेसाठी सजग राहणे ही या महिला सुरक्षा रक्षकांची महत्त्वाची जबाबदारी असेल.
या कार्यक्रमास राज्य राखीव पोलिस बल गट क्र. १० चे अधिकारी डि वार एस पी/महेश मते, व प्रदीप तांगडे, महाराष्ट्र राज्य सुरक्षा महामंडळाचे अधिकारी, प्रशिक्षणार्थींचे पालक, पत्रकार तसेच मान्यवर मोठ्या संख्येने उपस्थित होते.या प्रशिक्षणादरम्यान अंतवर्ग प्रमुख पोलीस उपनिरीक्षक तुषार साळुंखे आणि बाह्यवर्ग प्रमुख पोलीस उपनिरीक्षक ज्ञानेश्वर पाटील यांच्या मार्गदर्शनाखाली प्रशिक्षण देण्यात आले. प्रशिक्षकांच्या टीमने अल्प कालावधीत या महिला प्रशिक्षणार्थींना उत्कृष्ट प्रशिक्षण दिले.कार्यक्रमाच्या शेवटी डीवायएसपी प्रदीप तांगडे यांनी आभार प्रदर्शन केले.
