TOP 25 । गट नोंदणीला जाताना सोलापुरात भाजप कडून गटबाजीचे दर्शन..!

सोलापूर महापालिकेतील भाजपच्या गट नोंदणीसाठी निवडून आलेल्या 87 नगरसेवकांपैकी 86 नगरसेवक आज साडेसहा वाजता पुण्याकडे रवाना झाले. एक नगरसेविका शालन शिंदे या पोलीस कोठडीत आहेत. सिव्हिल चौकात असलेल्या सोलापूर शहर भाजप कार्यालयातून एकत्रितपणे सर्वांनी दोन लक्झरी बसच्या माध्यमातून जाण्याचे नियोजन करण्यात आले होते. मात्र इथेही गटबाजीचे दर्शन झाले. अनेक नगरसेवक आपापल्या खाजगी गाडीने पुण्याकडे रवाना झाले आहेत. तर काही नगरसेवक कालच पुण्यात पोहोचले.या बाबीमुळे भाजप शहराध्यक्ष रोहिणी पडवळकर सकाळी सकाळी चांगलंच संतापल्या होत्या. आज भाजपकडून विभागीय आयुक्तांच्या समोर उपस्थित महापालिकेतील गटाची नोंदणी केली जाणार आहे. तसेच गटनेता देखील नियुक्त केले जाणार आहे. सोमवारी महापौरआणि उपमहापौर पदासाठी नगरसेवक कार्यालयात उमेदवारी अर्ज भरण्याची प्रक्रिया सुरू होणार आहे त्यामुळे आता 6 फेब्रुवारी रोजी होणाऱ्या महापालिकेच्या पहिल्या सभेकडे शहराचे लक्ष लागले आहे