सोलापूर: स्वामी विवेकानंद इन्स्टिट्यूट ऑफ टेक्नॉलॉजी (SVIT) मध्ये नुकतेच डिप्लोमा आणि एम.बी.ए. (MBA) च्या प्रथम वर्षाच्या विद्यार्थ्यांसाठी विशेष मार्गदर्शन सत्राचे आयोजन करण्यात आले होते. “मन शांत कसे ठेवावे, अभ्यास कसा करावा आणि तो लक्षात कसा ठेवावा?” या अत्यंत महत्त्वाच्या विषयावर श्री. विलास जाधव सर यांनी विद्यार्थ्यांना संबोधित केले.
सध्याच्या काळात विद्यार्थ्यांवर अभ्यासाचा आणि करिअरचा मोठा ताण असतो. या पार्श्वभूमीवर आयोजित केलेल्या या सत्रात जाधव सरांनी विद्यार्थ्यांना तणावमुक्त जीवनाचा मार्ग दाखवला. “अभ्यास म्हणजे केवळ पाठांतर नव्हे, तर ती एक आनंदाने करण्याची प्रक्रिया आहे,” असे सांगताना त्यांनी मन एकाग्र करण्यासाठी सोप्या पद्धती आणि मेडिटेशनचे महत्त्व समजावून सांगितले.
व्याख्यानादरम्यान त्यांनी ‘स्मरणशक्ती कशी वाढवावी’ यावर विशेष भर दिला. वाचलेले लक्षात राहत नाही, ही विद्यार्थ्यांची नेहमीची तक्रार असते. यावर उपाय सांगताना सरांनी रिव्हिजनचे तंत्र (Revision Techniques) आणि अभ्यासाच्या नियोजनाच्या (Study Planning) टीप्स दिल्या. “जेंव्हा मन शांत असते, तेंव्हाच बुद्धीला धार येते,” हा मूलमंत्र त्यांनी विद्यार्थ्यांना दिला.
या कार्यक्रमाला डिप्लोमा आणि एम.बी.ए. प्रथम वर्षाच्या विद्यार्थ्यांनी मोठ्या संख्येने उपस्थिती लावली होती. व्याख्यान अत्यंत खेळीमेळीच्या वातावरणात पार पडले आणि विद्यार्थ्यांनी सरांना विविध प्रश्न विचारून आपल्या शंकांचे निरसन करून घेतले. महाविद्यालयाच्या वतीने अशा उपयुक्त कार्यक्रमाचे आयोजन केल्याबद्दल विद्यार्थ्यांनी समाधान व्यक्त केले.
