श्री छत्रपती शिवाजी विद्यालय वीट व न्यू सोलापूर क्लब यांच्या संयुक्त विद्यमाने आयोजन..
सोलापूर – किशोर-किशोरी १४ वर्षाखालील जिल्हा अजिंक्यपद व निवड चाचणी खो खो स्पर्धा करमाळ्यातील वीटमध्ये छत्रपती शिवाजी विद्यालयाच्या मैदानावर बुधवार १० डिसेंबर २०२५ रोजी होईल.
ही स्पर्धा सोलापूर खो खो ॲम्युचर असोसिएशन, श्री छत्रपती शिवाजी विद्यालय वीट आणि न्यू सोलापूर क्लब सोलापूर यांच्या संयुक्त विद्यमाने आयोजित केली आहे. या स्पर्धेतून वडाळा मुंबई येथे २५ ते २८ डिसेंबर दरम्यान होणाऱ्या ३९वी किशोर-किशोरी राज्य अजिंक्यपद व निवड चाचणी खो खो स्पर्धेसाठी जिल्ह्याचे संघ निवडण्यात येणार आहेत.
या स्पर्धेसाठी किशोर-किशोरी १४ वर्षाखालील म्हणजेच ५ फेब्रुवारी २०१२ रोजी अथवा त्यानंतर जन्मलेले असावेत. तसेच किशोर-किशोरीसाठी वय,उंची व वजन २१५ असे मूल्यांकन असेल. खेळाडूंनी जन्मतारखेचा दाखला व आधार कार्ड दाखवणे बंधनकारक आहे. संबंधित किशोर-किशोरी हे सोलापूर जिल्ह्यातील शाळा व महाविद्यालयात शिकणारे असले पाहिजे.
प्रवेश शुल्क भरल्याशिवाय भाग्यपत्रिकेत संघाचे नाव समाविष्ट करण्यात येणार नाही याची इच्छुक संघानी नोंद घ्यावी. संलग्न जिल्हा संघानी संघटनेचे तांत्रिक समितीचे सचिव शिवशंकर राठोड मो. 70208 69729 यांच्याकडे प्रवेश शुल्कासह विविध नमुन्यातील अर्जासह ९ डिसेंबर रोजी सकाळी १० वाजेपर्यंत नोंदणी करावी, असे आवाहन सोलापूर ॲम्युचर खो-खो असोसिएशनचे अध्यक्ष महेश गादेकर व सचिव उमाकांत गायकवाड यांनी केले आहे.
