जय संतोषीमाता गोशाळेतर्फे सोलापूरकरांना अध्यामिक पर्वणी : लाभ घेण्याचे आवाहन
सोलापूर – जय संतोषीमाता गोशाळेतर्फे तिरुपती देवस्थानचे अध्यात्मिक सल्लागार ब्रह्मश्री डॉ. चागंटी कोटेश्वरराव महाराज यांची ‘श्री देवीमाता वैभवम’ या विषयावरील प्रवचनमाला ८, ९ आणि १० नोव्हेंबर रोजी सायंकाळी ६ वाजता वालचंद महाविद्यालयाजवळील वल्याळ क्रीडांगण येथे होणार असल्याची माहिती स्वागत अध्यक्ष डॉ. सूर्यप्रकाश कोठे आणि संयोजक डॉ. राजेंद्रप्रसाद गाजूल यांनी मंगळवारी पत्रकार परिषदेत दिली.
अध्यात्माचे महान तत्त्वज्ञान अतिशय सोप्या भाषेत अत्यंत रसाळ वाणीद्वारे सांगणारे ब्रह्मश्री डॉ. चागंटी कोटेश्वरराव महाराज यांची सोलापुरात प्रचंड लोकप्रियता आहे. विशेष म्हणजे तेलगू भाषेत होणारे हे प्रवचन ऐकण्यासाठी दरवर्षी हजारो भक्तगण उपस्थित राहतात.
प्रवचनमाला समितीच्या स्वागताध्यक्षपदी डॉ. सूर्यप्रकाश कोठे यांची तर अध्यक्षपदी गणेश बुधारम यांची निवड झाली आहे. यापूर्वी सोलापूरात २०१७ साली ‘शिवानंद लहरी, गोमाता वैभवम’ या विषयावर, २०१९ साली ‘श्री मार्कंडेय ऋषी चरित्र’ या विषयावर तर २०२३ साली ‘श्रीकृष्ण लिलामृत’ या विषयावर ब्रह्मश्री डॉ. चागंटी कोटेश्वरराव महाराज यांची प्रवचने झाली आहेत. यंदाच्यावर्षी ते श्री देवीमाता वैभवम या विषयावर प्रवचन करणार आहेत. तसेच दैनंदिन जीवनात संकटांवर मात करत आनंदी जीवन कसे जगावे याबाबत ते सोलापूरकरांना मार्गदर्शन करणार आहेत. त्याचबरोबर सकाळच्या सत्रात जिज्ञासूंसोबत अध्यात्मासह इतर सामाजिक विषयांवरही ते चर्चा करणार आहेत.
भाविकांनी या प्रवचनांचा लाभ घ्यावा आणि अधिक माहितीसाठी ९८५०५५०९०३, ७०२०५१५०१२ या भ्रमणध्वनी क्रमांकावर संपर्क साधावा, असे आवाहन स्वागताध्यक्ष डॉ. सूर्यप्रकाश कोठे आणि संयोजक डॉ. राजेंद्रप्रसाद गाजूल यांनी केले आहे.
या पत्रकार परिषदेस अध्यक्ष गणेश बुधारम, कार्याध्यक्ष पेंटप्पा गड्डम, मुरलीधर आरकाल, खजिनदार गोवर्धन कमटम, उपाध्यक्ष हरिदास पोटाबत्ती, डॉ. प्रभाकर गुंडू, संयोजक डॉ. राजेंद्रप्रसाद गाजुल प्रसिद्ध प्रमुख नागेश सरगम उपस्थित होते.
