पंढरपूर – कार्तिकी एकादशीनिमित्त आज पंढरपुरात उपमुख्यमंत्री एकनाथ शिंदे आणि त्यांच्या पत्नी लता यांच्या हस्ते विठ्ठल-रुक्मिणीची शासकीय महापूजा पार पडली. त्यानंतर मंदिर समितीच्या वतीने त्यांचा सत्कार करण्यात आला. यावेळी बोलताना एकनाथ शिंदे यांनी पंढरपूरच्या विकासासाठी काही ठोस मुद्दे मांडले. दर्शन मंडपाचे 130 कोटी रुपयांचे काम सुरू असून त्याला गती देण्याच्या सूचना त्यांनी यावेळी दिल्या. विठ्ठल रुक्मिणी मंदिर समितीकडे असलेली एमटीडीसी च्या जागेला तीस वर्ष मुदतवाढ देण्याचा निर्णय त्यांनी जाहीर केला. सिटी सर्वे क्रमांक 161 मधील जागा देखील मंदिर समितीला देऊ असे त्यांनी आश्वासन दिले. चंद्रभागा नदीचे प्रदूषण रोखण्यासंदर्भात लवकरच ठोस कृती कार्यक्रम राबवू असे देखील ते म्हणाले. शासकीय महापूजेचा मान मिळणाऱ्या वारकऱ्यांना वर्षभर एसटीचा मोफत पास देण्याऐवजी कायमस्वरूपी मोफत पास देण्याचा निर्णय त्यांनी जाहीर केला.
यावेळी त्यांच्या समवेत पालकमंत्री जयकुमार गोरे मंत्री भरत गोगावले, खासदार श्रीकांत शिंदे, आमदार समाधान आवताडे, आमदार अभिजीत पाटील, आमदार तानाजी सावंत, यांच्यासह जिल्हाधिकारी कुमार आशीर्वाद झेडपीचे सीईओ कुलदीप जंगम पोलीस अधीक्षक अतुल कुलकर्णी उपस्थित होते
