सोलापूर, दिनांक 31(जिमाका):-महाराष्ट्र शासनाच्या इतर मागास बहुजन कल्याण विभागांतर्गत राज्यातील इतर मागास वर्ग, विमुक्त जाती, भटक्या जमाती व विशेष मागास प्रवर्गातील उच्च शिक्षण घेणाऱ्या विद्यार्थ्यासाठी, मुला,मुलींचे शासकीय वसतिगृह, ज्ञानज्योती सावित्रीबाई फुले आधार योजना व पंडीत दीनदयाल उपाध्याय स्वयंम योजना या योजनेकरीता शैक्षणिक वर्ष सन 2025-26 मध्ये बी.ए., बी.कॉम., बी.एस्सी अशा 12 वी नंतरच्या अभ्यासक्रमामध्ये प्रवेश घेतलेल्या, पदवी आणि एम.ए., एम.एस्सी असे पदवी नंतरचे पदव्युत्तर अभ्यासक्रमास (व्यावसायिक अभ्यासक्रम वगळून ) प्रवेश घेतलेल्या विद्यार्थ्यांना ऑनलाईन पद्धतीने https://hmas.mahait.org या संकेतस्थळावर अर्ज करण्याची प्रक्रिया खालील वेळापत्रकाप्रमाणे दि. 01 ऑगस्ट 2025 ते 17 ऑगस्ट 2025 या कालावधीत सुरु राहणार आहे.
मुला, मुलींचे शासकीय वसतिगृह, आधार व स्वयंम योजना सन 2025-26 साठीचे प्रवेशाचे वेळापत्रक:- बी.ए., बी.कॉम., बी.एस्सी अशा 12 वी नंतरच्या अभ्यासक्रमामध्ये प्रवेश घेतलेल्या पदवी आणि एम.ए., एम.एस्सी असे पदवी नंतरचे पदव्युत्तर अभ्यासक्रमास (व्यावसायिक अभ्यासक्रम वगळून)
प्रवेशासाठी अर्ज करावयाचा कालावधी- दि.01 ऑगस्ट 2025 ते दि.17 ऑगस्ट 2025, अर्ज छाननी करावयाचा कालावधी- दि.18 ऑगस्ट 2025 ते दि.21 ऑगस्ट 2025 पहिली निवड यादी गुणवत्तेनसार अंतिम करणे व प्रसिद्ध करणे- दि.22 ऑगस्ट 2025, पहिल्या निवड यादीनुसार प्रवेशाची अंतिम मुदत- दि.04 सप्टेंबर 2025, रिक्त जागेवर दुसऱ्या प्रतिक्षा यादीमधील विद्यार्थ्यांची गुणवत्तेनुसार निवड यादी प्रसिद्ध करणे- दि.05 सप्टेंबर 2025, रिक्त निवड यादीतील विद्यार्थ्यांना प्रवेशाची अंतिम मुदत- दि.15 सप्टेंबर 2025 रोजी असेल.
योजनेअंतर्गत सोलापूर जिल्ह्यात 100 विद्यार्थी क्षमतेचे मुलींकरीता 1 व मुलांकरीता 1 असे 2 वसतिगृहे सुरु करण्यात आलेली आहेत. त्यानुसार प्राप्त अर्जांमधून प्रवर्गनिहाय गुणवत्तेनुसार निवड यादी अंतिम करुन दि. 05 सप्टेंबर 2025 रोजी शासन निर्देशानुसार प्रसिद्ध केली जाईल. तरी जिल्ह्यातील इतर मागासवर्ग, विमुक्त जाती – भटक्या जमाती व विशेष मागास प्रवर्गातील वरील अभ्यासक्रमास शिक्षण घेणाऱ्या विद्यार्थ्यांनी सदर योजनांचा लाभ घ्यावा असे इतर मागास बहुजन कल्याणचे, सहायक संचालक, गणेश सोनटक्के यांनी आवाहन केले आहे.
