बालाजी स्पेशालिटी केमिकल्सच्या ९५ लाखाच्या निधीतून केले सुसज्ज, चांगल्या सोयी सुविधा केल्या उपलब्ध !
सोलापूर : भारतातील अग्रगण्य रसायन उद्योग बालाजी अमाईन्स संचलित बालाजी स्पेशालिटी केमिकल्स लिमिटेड कंपनीने आपली सामाजिक बांधिलकी जपत ९५ लाख रुपये निधीतून नूतनीकरण केलेल्या महापालिकेच्या दाराशा प्रसुतीगृहाचे लोकार्पण शनिवार दि. ८ मार्च रोजी सकाळी १०:३० वाजता करण्यात येणार आहे, अशी माहिती बालाजी स्पेशालिटी केमिकल्सचे व्यवस्थापकिय संचालक एन. राजेश्वर रेड्डी आणि बालाजी अमाईन्सचे व्यवस्थापकिय संचालक डी. राम रेड्डी यांनी पत्रकार परिषदेत दिली.
डफरीन चौक येथील महापालिकेच्या पुण्यश्लोक अहिल्यादेवी होळकर प्रसुतीगृहाच्या नूतनीकरण केले होते. खाजगी रुग्णालयांप्रमाणे उत्तम सोयी-सुविधा उपलब्ध करुन दिल्यामुळे त्याठिकाणी गरोदर महिलांची प्रसुतीपूर्व आणि नंतर उत्तमप्रकारे देखभाल आणि काळजी घेण्यात येत आहे. त्यानंतर आता गांधीनगर नजीकच्या दाराशा प्रसुतीगृहाचे नूतनीकरण करुन कायापालट केला आहे. दाराशा प्रसुतीगृह हे अत्यंत जीर्ण अवस्थेत होते. सोलापूर महानगरपालिकेच्या वतीने याठिकाणी मोफत उपचार करण्यात येतात. परंतु याठिकाणच्या पायाभुत सुविधांच्या कमतरतेमुळे कर्मचारी, रुग्ण आणि महिलांची खूप गैरसोय होत होती. त्याअनुषंगाने महापालिकेच्या तात्कालीन आयुक्त शीतल तेली-उगले यांनी बालाजी अमाईन्सच्या व्यवस्थापनाकडे दाराशा प्रसुतीगृहाचे नुतनीकरण करण्याची विनंती केली होती. त्यांच्या प्रस्तावानुसार बालाजी अमाईन्स संचलित बालाजी स्पेशालिटी केमिकल्स लिमिटेडच्या माध्यमातून दाराशा प्रसुतीगृहाचे नूतनीकरणाचे काम पूर्ण केले आहे. नूतनीकरणामुळे या प्रसुतीगृहाचे रुपडे पालटले आहे. डफरीन चौकातील पुण्यश्लोक अहिल्यादेवी होळकर प्रसुतीगृहात महापालिका आणि तेथील कर्मचारी स्वच्छता, सुरक्षा, नीटनेटकेपणा, जलद रुग्णसेवा आणि व्यवस्थापन योग्य प्रकारे करत आहेत. त्याचप्रमाणे दाराशा प्रसुतीगृहातील कर्मचारीही उत्तम व्यवस्थापन करतील, अशी अपेक्षा व्यवस्थापकिय संचालक डी. राम रेड्डी यांनी व्यक्त केली.
“दाराशा” मध्ये नूतनीकरणाअंतर्गत केली ही कामे
महापालिकेच्या दाराशा प्रसुतीगृहात संपूर्ण इमारतीची डागडूजी, दुरुस्ती व मजबुतीकरण करणे, नविन विद्युतीकरण, प्लम्बिंग, टाईल्स व फरशीकरण, पी ओ पी, अंतर्गत मांडणी बदलणे, रंगकाम, नविन वैद्यकिय उपकरणे, साहित्य पुरविणे आदी जवळपास ९५ लाखांची कामे याठिकाणी करण्यात आली आहेत, असे व्यवस्थापकिय संचालक डी. राम रेड्डी यांनी सांगितले.
बालाजी अमाईन्सचे सतत सामाजिक कार्यात योगदान
सोलापूर, धाराशिव आणि हैद्राबाद याठिकाणाहून कंपनीचे उत्पादन आणि कामकाज सुरु आहे. सीएसआर ही तर अलीकडील काळातील सरकारने आणलेली संकल्पना आहे. मात्र बालाजी अमाईन्स परिवाराने समाजाप्रती आपण काही देणे लागतो ही भावना सुरुवातीपासूनची जपली आहे. बालाजी फाउंडेशनच्या माध्यमातून सतत सामाजिक कार्यात योगदान दिले आहे. कंपनीने यापूर्वी १.२० कोटी रुपये निधीतून रूपाभवानी विद्युत दाहिनी, १.२५ कोटी निधीतून महापालिकेचे डफरीन चौकातील प्रसुतीगृह नूतनीकरण आणि आता ९५ लाख रुपये निधीतून दाराशा रुग्णालयाचा कायापालट केला आहे, असे व्यवस्थापकिय संचालक डी. राम रेड्डी यांनी सांगितले.
