सोलापूर दि. 25 (जिमाका) – अहमदनगर- सोलापूर- अक्कलकोट (कर्नाटक हद्द) चौपदरीकरणासाठी भूसंपादन (सुरत – चेन्नई ग्रीनफिल्ड कॉरिडोर प्रकल्प) कामकाजाअंतर्गत अक्कलकोट, बार्शी, दक्षिण सोलापूर व उत्तर सोलापूर तालुक्यातील 58 गावांतील जमिनी संपादित करण्यात आलेल्या आहेत. महामार्गाकरिता प्राप्त प्रस्तावामधील नुकसानभरपाई मंजूरी आदेश भूमी राशी पोर्टल (एफटीओ) द्वारे प्रकल्प संचालक, भारतीय राष्ट्रीय राजमार्ग प्राधिकरण यांचेकडे पाठविण्यात आले असून, सदरहू कार्यवाही एनएचआय स्तरावरुन प्रलंबित असल्याची माहिती उपजिल्हाधिकारी (भूसंपादन क्र.11) प्रमोद गायकवाड यांनी दिली.
संपादीत करण्यात आलेल्या तालुका व गावनिहाय प्रलंबित नुकसान भरपाई, वाटपाची माहिती दिनांक 23 जानेवारी ते 20 फेब्रुवारी 2025 या कालावधीतील अक्कलकोट, बार्शी, दक्षिण सोलापूर तालुक्यातील एकूण 84 नुकसानभरपाई मंजूरी आदेश व 308 खातेदारांची नुकसानभरपाई रक्कम रु. 15.92 कोटी भूधारकांच्या खातेमध्ये जमा करण्यासाठी राष्ट्रीय महामार्ग प्राधिकरण सोलापूर यांचे कार्यालयाकडे पाठविण्यात आले आहेत. या प्रकरणांमधील पुढील कार्यवाही करणेची जबाबदारी भारतीय राष्ट्रीय राजमार्ग प्राधिकरण विभागाची असून प्राधिकरणामार्फत सदरची रक्कम बाधीत भूधारकांच्या खातेवर जमा करण्यात आलेली नाही.
तसेच अहमदनगर- सोलापूर- अक्कलकोट (कर्नाटक हद्द) चौपदरीकरणासाठी भूसंपादन (सुरत – चेन्नई ग्रीनफिल्ड कॉरिडोर प्रकल्प) कामकाजाअंतर्गत सन 2023 ते 2025 या कालावाधीमध्ये एकूण 33 मूळ व पुरवणी निवाडे जाहीर करण्यात आले असून निधी मंजूरीकरिता राष्ट्रीय महामार्ग प्राधिकरण सोलापूर यांचे कार्यालयाकडे पाठविण्यात आले आहेत.
सक्षम प्राधिकारी कार्यालयाकडून घोषीत करण्यात आलेल्या 33 निवाडयांमधील एकूण संपादित क्षेत्र 206.64 हे. आर करीता निवाड्याची रककम रुपये 491.53 कोटी अनुदान उपलब्ध होऊन मिळणेबाबत प्रकल्प संचालक, भारतीय राष्ट्रीय राजमार्ग प्राधिकरण सोलापूर व महाव्यवस्थापक (तां), राष्ट्रीय महामार्ग प्रादेशिक कार्यालय, मुंबई या कार्यालयाकडे पाठपुरावा करण्यात आलेला आहे. प्रस्तावित महामार्गाकरिता जाहीर करण्यात आलेल्या निवाडयांमध्ये निधी उपलब्ध करुन देण्याची जबाबदारी भारतीय राष्ट्रीय राजमार्ग प्राधिकरण विभागाची असल्याचेही उपजिल्हाधिकारी (भूसंपादन क्र.11) प्रमोद गायकवाड यांनी कळविले आहे.
