पुण्यातून सोलापुरला आपल्या गावी गेलेल्या एका जीबीएस बाधित रूग्णाचा मृत्यू झाल्याची माहिती समोर आली होती. त्यानंतर पुण्यातील सिंहगड परिसरात राहणाऱ्या 56 वर्षीय महिलेचा मृत्यू झाला होता. मृत महिला रूग्ण कॅन्सरग्रस्त होती. 15 जानेवारी रोजी ससून रुग्णालयात त्या महिलेला दाखल करण्यात आले होते. उपचारांच्या दरम्यान महिलेचा मृत्यू झाला होता.
दिनांक 30 जानेवारी रोजी सकाळी पिंपरी चिंचवड शहरामध्ये जीबीएसचा पहिला रुग्ण दगावला आहे. 36 वर्षीय हा तरुण पिंपळे गुरवचा रहिवासी होता. 21 जानेवारीला तो पालिकेच्या वायसीएम रुग्णालयात दाखल झाला. मात्र उपचारासाठी आला तेव्हापासूनच तो व्हेंटिलेटरवर होता. गेली आठ दिवस त्याला वाचवण्यासाठी डॉक्टरांनी बरेच प्रयत्न केले, मात्र काल त्या तरूणाचा मृत्यू झाला आहे. शहरात आत्तापर्यंत जीबीएसचे 13 रुग्ण आढळले आहेत, पिंपरी चिंचवड शहरामध्ये हा पहिला बळी ठरला आहे.
