सोलापूर, दि. १६- पुण्यश्लोक अहिल्यादेवी होळकर सोलापूर विद्यापीठाच्या बीएससी बायोटेक्नॉलॉजी अंतिम वर्षाच्या परीक्षेचा निकाल रविवारी जाहीर झाला. बीए, बीकॉम, बीएससी, बीसीए, बीबीए आणि बीटेक अभ्यासक्रमाच्या अंतिम वर्षाच्या परीक्षेचा निकाल देखील पुढील दोन दिवसात जाहीर होणार असल्याची माहिती प्र- कुलगुरू डॉ. गौतम कांबळे यांनी दिली.
पुण्यश्लोक अहिल्यादेवी होळकर सोलापूर विद्यापीठाच्या परीक्षा विभागाकडून माहे मार्च-एप्रिल २०२३ च्या उन्हाळी सत्राच्या विविध अभ्यासक्रमांच्या परीक्षांचे निकाल जाहीर होण्यास रविवारपासून सुरुवात झाली आहे. प्रभारी कुलगुरू डॉ. राजनीश कामत यांच्या मार्गदर्शनाखाली विद्यापीठ व परीक्षा विभागाची टीम परीक्षांचे निकाल लवकरात लवकर जाहीर करण्यासाठी रात्रंदिवस उत्तरपत्रिकांची तपासणी व निकाल लावण्यासाठी काम करीत आहे. यामुळे परीक्षा संपल्यानंतर अवघ्या काही दिवसांमध्ये वेळेवर निकाल जाहीर होत आहेत. परीक्षा झालेल्या सर्वच अभ्यासक्रमांच्या परीक्षांचे निकाल वेळेत जाहीर करण्यासाठी यंत्रणा काम करीत असल्याचे कुलसचिव योगिनी घारे आणि परीक्षा संचालक डॉ. शिवकुमार गणपुर यांनी सांगितले.
प्रभारी कुलगुरू डॉ. कामत यांच्याकडून परीक्षा विभागाच्या टीमचे कौतुक
पुण्यश्लोक आहिल्यादेवी होळकर सोलापूर विद्यापीठामार्फत घेण्यात आलेल्या विविध अभ्यासक्रमांच्या परीक्षांच्या उत्तरपत्रिकांची तपासणी उद्या (सोमवारी) दुपारपर्यंत पूर्ण होणार आहे. दि. ७ जुलैला शेवटचा पेपर संपलेला असून आज (रविवार) दि. 16 जुलैला परीक्षेचा निकाल जाहीर होण्यास सुरुवात झाली आहे. विद्यापीठाच्या इतिहासात प्रथमच अल्प कालावधीत उत्तरपत्रिकांची तपासणी पूर्ण होऊन निकाल जाहीर करण्यात येत असल्याची नोंद होत आहे. यामुळे विद्यापीठातील सर्व संविधानिक अधिकारी, अधिष्ठाता, सहयोगी अधिष्ठाता तसेच प्राचार्य, प्राध्यापक, अधिकारी व कर्मचाऱ्यांचे सहकार्य लाभले, त्यामुळे त्यांचे अभिनंदन व कौतुक असल्याचे मत प्रभारी कुलगुरू डॉ. राजनीश कामत यांनी व्यक्त केले. निकाल जाहीर होत असल्याने आता सीईटी परीक्षेस ही काही अडचण नसल्याचे त्यांनी यावेळी स्पष्ट केले.
