- सोलापूर – पुण्यश्लोक अहिल्यादेवी होळकर शोध संस्थानच्या वतीने शैक्षणिक क्षेत्रात दिलेल्या योगदानाबद्दल पुण्यश्लोक अहिल्यादेवी होळकर सोलापूर विद्यापीठाच्या कुलगुरू डॉ. मृणालिनी फडणवीस यांचा युवराज यशवंतराव होळकर यांच्या हस्ते मानपत्र, सन्मानचिन्ह देवून सन्मान करण्यात आला.
- नाशिक जिल्ह्यातील चांदवड येथे पुण्यश्लोक अहिल्यादेवी होळकर शोध संस्थानच्या वतीने महाराजा यशवंतराव होळकर महोत्सवाचे आयोजन करुन विविध क्षेत्रातील मान्यवरांचा पुरस्कार देवून गौरव करण्यात आला. यात शैक्षणिक क्षेत्रात योगदान दिल्याबद्दल कुलगुरू डॉ. मृणालिनी फडणवीस यांचा सन्मान करण्यात आला. नेमिनगर, चांदवड येथील स्व. कांताबाई भवरलालजी जैन अभियांत्रिकी महाविद्यालयाच्या मोहनलाल चंपालाल सांखला सभागृहात हा सोहळा होळकर राजघराण्यांचे वंशज श्रीमंत यशवंतराव होळकर महाराज यांच्या प्रमुख उपस्थितीत पार पडला. यावेळी प्राचार्य जी. एच. जैन, संस्थेचे मानद सचिव जवाहरलाल आबड, प्राचार्य महादेव कोकाटे, संयोजक रामभाऊ लांडे, डॉ. दिलीप बलसेकर, उपजिल्हाधिकारी देविदास चौधरी आदी मान्यवर उपस्थित होते.
- सोलापूर विद्यापीठाचा पुण्यश्लोक अहिल्यादेवी होळकर सोलापूर विद्यापीठ असा नामविस्तार झाल्यानंतर कुलगुरू डॉ. फडणवीस यांनी विद्यापीठात अहिल्यादेवी यांचा अध्यासन केंद्र व अहिल्यादेवींच्या चरित्रावर अभ्यास, संशोधन त्या माध्यमातून विविध उपक्रम तसेच आता अहिल्यादेवींचा भव्य पुतळा उभारण्याचे काम अतिशय चांगल्या प्रकारे करीत असल्याने त्यांचा यावेळी सन्मान करण्यात आल्याचे संयोजक लांडे यांनी सांगितले.
सत्कारास उत्तर देताना कुलगुरू डॉ. फडणवीस यांनी संयोजकांचे आभार मानून पुण्यश्लोक अहिल्यादेवी होळकर यांनी साधारण 300 वर्षांपूर्वी अनेक संकटांना सामोरे जात आदर्श राज्य कारभार करीत समाज सुधारण्याचे महान कार्य केले. प्रशासकीय कार्यभार सांभाळत अनेक मंदिरांचा जीर्णोद्धार, विहीर पुनर्भरण तसेच त्यांनी केलेले जलसंधारणाची कामे आदर्शवत असल्याचेही कुलगुरू डॉ. फडणवीस यांनी सांगितले.
