मुंबई : ओबीसी समाजाच्या राजकीय आरक्षणासाठी भाजपने आक्रमक भूमिका घेतली आहे. ओबीसी आरक्षणासाठी भाजपने मंत्रालयावर काढलेला धडक मोर्चा भाजप कार्यालयातच पोलिसांनी रोखला आहे. याशिवाय भाजपचे प्रदेशाध्यक्ष चंद्रकांत पाटील, पक्षाचे ज्येष्ठ नेते सुधीर मुनगंटीवार, विधानपरिषदेचे विरोधी पक्षनेते प्रवीण दरेकर, आमदार गोपीचंद पडळकर यांना पोलिसांनी ताब्यात घेतलं आहे.
ओबीसींना राजकीय आरक्षण मिळवून द्या या मागणीसाठी भाजप ओबीसी मोर्चाचे अध्यक्ष योगेश टिळेकर यांच्या नेतृत्त्वाखाली हा मोर्चा काढण्यात येत आहे. यानंतर चंद्रकांत पाटील, सुधीर मुनगंटीवार, प्रवीण दरेकर यांच्यासह भाजपचे आमदार आणि पदाधिकारी या मोर्चात सहभागी झाले. भाजप कार्यालय ते मंत्रालय असा हा मोर्चा होता.
