मुंबई : आपण एकत्रितपणे काम करु, त्यात काही अडचण नाही. मी तुमच्यासोबत काम करेन, तुम्ही त्याचे नेतृत्व करा असे आश्वासन राज्याचे विधानसभा विरोधी पक्षनेते देवेंद्र फडणवीस यांनी राज्याचे अन्न,नागरी पुरवठा व ग्राहक संरक्षण मंत्री छगन भुजबळांना दिले आहे.
भुजबळ आणि फडणवीस यांच्यामध्ये सागर या निवासस्थानी ओबीसी आरक्षणाच्या मुद्द्यावरून चर्चा झाली.भेटीनंतर फडणवीसांनी प्रसारमाध्यमांशी संवाद साधला. यावेळी ते म्हणाले की, “ भुजबळ ओबीसी राजकीय आरक्षणासंदर्भात मला भेटण्यासाठी आले होते. त्यांनी मला इम्पेरिकल डेटा कसा गोळा करता येईल यासंबंधी मत जाणून घेतले . यावेळी मी त्यांना मराठा आऱक्षणावेळी कसा इम्पेरिकल डेटा गोळा केला आणि तो सुप्रीम कोर्टाने कसा वैध ठरवला याची माहिती दिली”. तसेच त्यांनी पुढाकार घ्यावा, एजन्सी नेमाव्यात आमच्याकडून पूर्ण मदत केली जाईल असे आश्वासनही दिल्याचे फडणवीसांनी यावेळी सांगितले .“मला जे काही वाटते त्याबद्दल त्यासंदर्भात नोटदेखील करुन देण्यास तयार आहे. आपण एकत्रितपणे काम करु, त्यात काही अडचण नाही. मी तुमच्यासोबत काम करेन, तुम्ही त्याचे नेतृत्व करा. आमच्याकडून पूर्ण मदत होईल, असे भुजबळांना सांगितले असल्याची माहिती फडणवीसांनी दिली.
