पावनेतीन लाखांचे दागिने वीस हजारांसह लंपास
सोलापूर : किचनचा दरवाजा उघडा असल्याची संधी साधून चोरट्यांनी आत प्रवेश करत बेडरूममधील लोखंडी कपाटाची चावी प्लास्टिक रॅकमधून शोधून काढत लॉकरमधील २०,००० रुपये रोख आणि सोन्या – चांदीचे २,७५,००० रुपयांचे दागिने चोरून नेल्याची घटना एमआयडीसी पोलिस ठाण्याच्या हद्दीत घडली आहे. कुमठा नाका येथील पारशी विहिरीजवळ शिवगंगा नगर भाग – ४ मध्ये राहणाऱ्या अरुण अंबादास केत यांनी या चोरीबाबत फिर्याद दाखल केली आहे. अंगठी, गळ्यातील चेन, गळ्यातील गंठण, नेकलेस, ठुशी ,कर्णफुले, कानातील झुबे , कानातील वेल, नाकातील नथ आणि चांदीचे साहित्य अशा दागिन्यांचा चोरीमध्ये समावेश असल्याचे फिर्यादीत म्हटले आहे. ३० मे रोजी दुपारी २ ते ४ च्या दरम्यान ही चोरी झाल्याचे फिर्यादीत म्हटले आहे. एमआयडीसी पोलिस ठाण्याचे पोलिस सबइन्स्पेक्टर माळी अधिक तपास करीत आहेत.
