येस न्युज मराठी नेटवर्क : कोरोनाच्या दुसऱ्या लाटेत आपल्याला ऑक्सिजन मिळविण्यासाठी प्रयत्न करावे लागले. त्यामुळेच अशा ऑक्सिजन निर्मिती प्रकल्पांना चालना देण्याचे आणि प्रोत्साहन देण्याचे धोरण आता राज्य शासनाने ठरविले आहे. सध्याच्या परिस्थितीत ऑक्सिजनसाठी इतरांवर अवलंबून राहणे परवडणारे नाही. त्यामुळे राज्यासाठी आवश्यक तीन हजार टन ऑक्सिजन निर्मिती राज्यातच व्हावी, यासाठी ठिकठिकाणी प्रकल्प उभारणी करण्यास परवानगी देण्यात आली आहे,’ अशी माहिती मुख्यमंत्री उद्धव ठाकरे यांनी दिली.
शिर्डी येथील साईबाबा संस्थान संचालित साईबाबा सामान्य रुग्णालय येथील मेडिकल ऑक्सिजन निर्मिती प्रकल्प आणि आरटीपीसीआर लॅबचे आज दूरदृश्य प्रणालीद्वारे मुख्यमंत्री ठाकरे यांच्या हस्ते उद्घाटन झाले. यावेळी उपमुख्यमंत्री अजित पवार, महसूलमंत्री बाळासाहेब थोरात, पालकमंत्री हसन मुश्रीफ, सार्वजनिक आरोग्यमंत्री राजेश टोपे, जलसंधारणमंत्री शंकरराव गडाख, राज्यमंत्री प्राजक्त तनपुरे, राज्याचे मुख्य सचिव सीताराम कुंटे यांच्यासह जिल्ह्यातील लोकप्रतिनिधी आणि अधिकारी या कार्यक्रमात दूरदूश्य प्रणालीद्वारे सहभागी झाले होते.
