येस न्युज मराठी नेटवर्क : वाढत्या कोरोना संक्रमणाच्या पार्श्वभूमीवर आज जिल्हा परिषदेतील सर्व अधिकारी व कर्मचारी यांचा गाव भेट दौरा आयोजित करण्यात आला होता.त्यानुसार जिल्हा परिषदेचे मुख्य कार्यकारी अधिकारी दिलीप स्वामी यांनी कोंडी येथे भेट देऊन कोरोना प्रतिबंधक उपाययोजनांची पाहणी करून आढावा घेतला.
यावेळी उपमुख्य कार्यकारी अधिकारी ( प्रशासन ) परमेश्वर राऊत, तालुका आरोग्य अधिकारी डॉ.श्रीकांत कुलकर्णी, सरपंच मंगल राठोड, उपसरपंच किसन भोसले, वैद्यकीय अधिकारी डॉ.बापट, ग्रामपंचायत सदस्य शिवाजी नीळ, प्रसाद नीळ, लक्ष्मण साबळे, मनोज निंबाळकर व ग्रामसेवक मारुती कांबळे आदी उपस्थित होते.यावेळी मुख्य कार्यकारी अधिकारी यांनी प्रथम संपूर्ण गावात फेरी मारून गावातील स्वच्छता, दुकानांची व्यवस्था आदींची पाहणी केली.यावेळी विना मास्क फिरणाऱ्या ग्रामस्थांना मुख्य कार्यकारी अधिकारी स्वामी यांनी खडे बोल सुनावले व मास्क घालण्या संदर्भात प्रबोधन केले.
यावेळी प्राथमिक आरोग्य केंद्र,कोंडी येथेही भेट देऊन कोरोना लसीकरण सत्राची यावेळी पाहणी करून आवश्यकत्या सुचना केल्या.तसेच जिल्हा परिषद शाळेस भेट देऊन ऑनलाइन शिक्षणासंदर्भात शिक्षकांशी संवाद साधला शाळेकडून राबवले जाणारे शैक्षणिक उपक्रम, शाळेतील बोलक्या भिंती यांचेही कौतुक केले.अंगणवाडी सेविका व आशा स्वयंसेविका यांनी केलेल्या कामाचा आढावा घेऊन कमी पगारात कोरोना सारख्या महामारीत अंगणवाडी सेविका व आशा स्वयंसेविका यांनी अतिउत्कृष्ट काम केल्याचे गौरवोदगार उपमुख्य कार्यकारी अधिकारी (प्रशासन ) परमेश्वर राऊत यांनी यावेळी काढले.दरम्यान आज मंगळवेढा तालुक्यातील आंधळगाव येथील आरोग्य वर्धिनी केंद्र येथे अतिरिक्त मुख्य कार्यकारी अधिकारी डॉ.अर्जून गुंडे यांनी आज भेट देऊन कोविड १९ याबाबत आढावा घेतला आणि यापुढे कशा पद्धतीने कामकाज करायचे याविषयी मार्गदर्शन केले.यावेळी गट विकास अधिकारी सुप्रिया चव्हाण , तालुका आरोग्य अधिकारी डॉ.नंदकुमार शिंदे, वैद्यकीय अधिकारी डॉ.दत्तात्रय शिंदे, सी.एच.ओ.डॉ.सरोदे यांच्यासह आरोग्य केंद्रातील सर्व कर्मचारी उपस्थित होते.
