येस न्युज मराठी नेटवर्क । IPL 2021 च्या हंगामासाठी १८ फेब्रुवारीला लिलाव प्रक्रिया पार पडणार आहे. या लिलावासाठी एकूण १११४ क्रिकेटपटूंनी नोंद केली होती. विविध देशांचे आंतरराष्ट्रीय खेळाडू आणि स्थानिक खेळाडू यांनी या लिलाव प्रक्रियेत सहभागी होण्याची इच्छा व्यक्त केली होती. त्यातून १८ फेब्रुवारीच्या लिलावासाठी २९२ खेळाडूंच्या नावांची अंतिम यादी निश्चित करण्यात आली आहे. या यादीत ग्लेन मॅक्सवेल, स्टीव्ह स्मिथ यांच्याबरोबरच मास्टरब्लास्टर सचिन तेंडुलकर याचा मुलगा अर्जुन तेंडुलकर याच्या बोलीवरही साऱ्यांचे विशेष लक्ष असणार आहे.
इंग्लंडचा कसोटी कर्णधार जो रूट आणि ऑस्ट्रेलियाचा वेगवान गोलंदाज मिचेल स्टार्क यांनी या लिलावातून माघार घेतली आहे. परंतु तरीदेखील अनेक मोठी नावं यंदा लिलावाच्या बाजारात असणार आहेत. खेळाडूंच्या मूळ किमतीनुसार त्यांची वर्गवारी करण्यात आली आहे. सर्वाधिक २ कोटी इतकी मूळ किंमत असणाऱ्यांमध्ये हरभजन सिंग, केदार जाधव, ग्लेन मॅक्सवेल, स्टीव्ह स्मिथ, शाकीब अल हसन, मोईन अली, सॅम बिलिंग्स, लियम प्लंकेट, जेसन रॉय, मार्क वूड या खेळाडूंचा समावेश आहे. दीड कोटी मूळ किंमत असणारे १२ तर १ कोटी मूळ किंमत असणारे ११ खेळाडू आहेत.
