सोलापूर : जिल्हा परिषदेत विविध कामासाठी रोज सर्वसामान्य नागरिक येत असतात, त्यांच्याशी सौजन्याची वागणूक ठेवा. शासकीय पत्रव्यवहार करीत असताना संसदीय भाषेचा योग्य वापर करण्यात यावा अशी सूचना जि.प.मुख्य कार्यकारी अधिकारी दिलीप स्वामी यांनी जिल्हा परिषदेतील सर्व विभागातील प्रशासकीय अधिकार्यांना दिले.
जिल्हा परिषदेच्या यशवंतराव सभागृहात गुरुवारी जिल्हा परिषदेतील सर्व कार्यालयीन अधिक्षक वर्गातील अधिकार्यांसाठी प्रशासकीय कामाबाबत प्रशिक्षण शिबीराचे आयोजन करण्यात आले होते. यावेळी सीईओ स्वामी यांनी उपस्थित असलेल्या अधिकार्यांना मार्गदर्शन केले.
विविध कामासाठी जिल्हा परिषद व पंचायत समिती कार्यालयात ग्रामिण भागातून नागरिक येतात. अनेकदा त्यांची कामे वेळेत होत नसल्याने त्यांची चिडचीड दिसून येत असते. त्यामुळे त्यांच्याकडून शासकीय कामकाजाबाबत त्रीव रोष व्यक्त होत असतो. कार्यालयात आलेल्या नागरिकांशी सौजन्याशी वागणूक ठेवून त्यांना योग्य मार्गदर्शन करुन त्यांचे काम विहीत मुदतीत करण्यात यावे अशी सूचना यावेळी सीईओ स्वामी यांनी केली.
शासकीय कामकाजात वरिष्ठ अधिकारी, राज्य शासन किंवा लोकप्रतिनिधी यांच्याकडे पत्रव्यवहार करत असताना पत्रात योग्य मजकूर असावा. संबधितांची सन्मानपुर्वक संबोधन पत्रातून करण्यात यावे. टिपणी सादर करत असतानाही योग्य मजूकर सादर करण्यात यावा. मराठी भाषा व व्याकरण याचे सविस्तर ज्ञान प्रत्येकास असणे आवश्यक आहे. टिपणी सादर करताना संबधित अधिकार्यांनी स्वंयस्पष्ट असा शेरा उल्लेख करावा.
फाईल सादर करताना त्या संबधित फाईलबाबतची सर्व संकीर्ण माहिती, शासन निर्णय व परिपत्रके सोबत सादर करण्यात यावीत. फाईलसोबत योग्य ती दस्तऐवज सादर करण्यात यावा. दिशाभूल करणारी किंवा अपुरी माहिती सादर करु नये अशाही सूचना यावेळी उपस्थित अधिकार्यांना देण्यात आले.
या शिबीरास प्रशासनाचे उपमुख्य कार्यकारी अधिकारी परमेश्वर राउत, शिक्षणाधिकारी संजयकुमार राठोड आदीसह सर्व खातेप्रमुख व कार्यालयीन अधिंक्षक उपस्थित होते.
