सोलापूरच्या डायव्हिंगपटू श्रावणी सूर्यवंशी हिची १२ वी एशियन एज ग्रुप डायव्हिंग चॅम्पियनशिप २०२६ स्पर्धेसाठी भारतीय संघात निवड झाली आहे. ही प्रतिष्ठेची स्पर्धा १६ ते २५ जुलै २०२६ या कालावधीत बँकॉक (थायलंड) येथे आयोजित करण्यात आली असून, श्रावणी भारतीय संघासोबत स्पर्धेसाठी रवाना झाली आहे.
श्रावणीची भारतीय संघात निवड तिच्या सातत्यपूर्ण आणि दमदार कामगिरीच्या जोरावर झाली आहे. १७ ते १९ जून २०२६ दरम्यान अहमदाबाद येथील वीर सावरकर स्पोर्ट्स कॉम्प्लेक्स येथे झालेल्या निवड चाचणी स्पर्धेत तिने १ मीटर स्प्रिंगबोर्ड, ३ मीटर स्प्रिंगबोर्ड आणि हायबोर्ड या तिन्ही प्रकारांत प्रथम क्रमांक पटकावत आपले वर्चस्व सिद्ध केले. या उल्लेखनीय कामगिरीमुळे तिची भारतीय संघात निवड निश्चित झाली.
अवघ्या १७ व्या वर्षी श्रावणीने डायव्हिंग या साहसी क्रीडा प्रकारात उल्लेखनीय यश संपादन केले आहे. शालेय तसेच फेडरेशनच्या विविध स्पर्धांमध्ये तिने आतापर्यंत एकूण ७४ पदकांची कमाई केली आहे.
तिची आतापर्यंतची पदकांची कामगिरी :
राज्यस्तर: ३० सुवर्ण, ६ रौप्य, १ कांस्य
राष्ट्रीय स्तर: २१ सुवर्ण, ६ रौप्य, २ कांस्य
आंतरराष्ट्रीय स्तर: २ सुवर्ण, ४ रौप्य, २ कांस्य
एकूण: ५३ सुवर्ण, १६ रौप्य आणि ६ कांस्य अशी ७४ पदकांची अभिमानास्पद कमाई श्रावणीने केली आहे.
श्रावणीच्या या यशामागे तिचे आंतरराष्ट्रीय दर्जाचे प्रशिक्षक श्रीकांत शेटे यांचे मोलाचे मार्गदर्शन आणि कठोर मेहनत लाभली आहे. त्यांच्या प्रशिक्षणामुळेच श्रावणीने राष्ट्रीय आणि आंतरराष्ट्रीय स्तरावर सातत्याने उत्कृष्ट कामगिरी करत भारतीय संघात स्थान मिळवले आहे.
आता बँकॉक येथे होणाऱ्या या प्रतिष्ठेच्या स्पर्धेत श्रावणी भारताचे प्रतिनिधित्व करणार असून, तिच्याकडून सुवर्णपदकाची अपेक्षा संपूर्ण देशाला आहे. सोलापूरसह महाराष्ट्रासाठी ही अभिमानाची बाब असून, श्रावणीने भारताचा तिरंगा उंचावत सुवर्णपदक जिंकावे, अशा शुभेच्छांचा वर्षाव सर्व स्तरातून होत आहे.
