निवासी उपजिल्हाधिकारी शमा पवार यांनी दिली माहिती
सोलापूर :- प्रधानमंत्री किसान सन्मान निधी योजनेतर्गंत पात्र शेतकरी कुटुंबास 2000 रुपये प्रती हप्ता या प्रमाणे 6000 रुपये प्रती वर्षी लाभ देण्यात येतो. योजनेच्या 14 व्या हप्त्याचा लाभ मे अथवा जून 2023 मध्ये जमा होणार आहे. हप्त्याच्या लाभासाठी बँक खाते आधारशी जोडणे बंधनकारक आहे. लाभार्थ्यांना त्यांचे बँक खाते आधार क्रमांकाशी जोडण्याची सुविधा गावातील पोस्ट कार्यालयात उपलब्ध करुन देण्यात आल्याची माहिती निवासी उपजिल्हाधिकारी शमा पवार यांनी दिली.
जिल्ह्यातील एकूण 1 लाख 92 हजार शेतकरी लाभार्थ्यांची बँक खाती त्यांच्या आधार क्रमांशी जोडलेली नाहीत. तसेच 1 लाख 41 हजार 370 लाभार्थ्यांनी पीएम किसान खात्याची ई-केवायसी प्रक्रिया पुर्ण केली नाही. त्यामुळे सदर लाभार्थ्यांना 14 व्या हप्त्याचा लाभ जमा होणार नाही. तसेच जे लाभार्थी वारंवार संपर्क करुनही ई-केवासी पुर्ण करीत नाहीत त्यांची नोंद घेवून संबधित लाभार्थ्यांस अपात्र मार्क करण्याच्या सूचना प्राप्त झाल्या आहेत.
लाभार्थ्यांना त्यांचे बँक खाते आधार क्रमांकाची जोडण्याची सुविधा त्यांच्याच गावातील पोस्ट ऑफिस मार्फत उपलब्ध करण्यात आली आहे. यासाठी आधार कार्ड, मोबाईल क्रमांक या कागदपत्राद्वारे इंडिया पोस्ट पेमेंट बँकेत आपल्या गावातील पोस्ट कर्मचाऱ्यांमार्फत खाते उघडावे. सदरचे बँक खाते आपल्या आधार क्रमांकाची 48 तासात जोडले जाईल. ही पध्दत अतिरिक्त कागदपत्राशिवाय करता येणार असल्याने अत्यंत सोपी व सुलभ आहे. बँक खाते सुरू करण्याची सुविधा आपल्याच गावातील पोस्ट कार्यालयात उपलब्ध असल्याने लाभार्थ्यांना इतरत्र जाण्याची गरज पडणार नाही.
पी.एम किसन योजनेतील प्रलंबित लाभार्थींची बँक खाते आयपीपीबी मध्ये उघडून ती आधार क्रमांक जोडण्यासाठी प्रत्येक तालुक्यात व जिल्ह्याच्या पोस्ट कार्यालयास गावनिहाय याद्या उपलब्ध करून दिल्या आहेत. त्याप्रमाणे गावातील पोस्ट मास्टर या लाभार्थ्यांना संपर्क करून आयपीपीबीमध्ये बँक खाती सुरू करतील. योजनेच्या १४ व्या हप्त्याच्या लाभासाठी आधार संलग्न बँक खाते अनिवार्य केलेले असल्याने आयपीपीबीमार्फत १५ मे २०२३ पर्यंत गावपातळीवर सर्वत्र मोहीम राबवण्यात येत आहे. आयपीपीबीमार्फत आयोजित या मोहिमेमध्ये जिल्ह्यातील सर्व प्रलंबित लाभार्थ्यांनी त्यांचे बँक खाते उघडून योजनेचा लाभ घ्यावा, असे आवाहनही निवासी उपजिल्हाधिकारी शमा पवार यांनी केले आहे.
