वर्ल्ड स्पेस वीक २०२५ च्या औचित्याने डब्ल्यू.आय.टी. मध्ये सोमवारी इस्रोचे प्रदर्शन व स्पर्धा..

सोलापूर – विद्यार्थ्यांच्या कल्पनाशक्तीला अथांग अंतराळविश्वाशी जोडणारा ऐतिहासिक उपक्रम आता सोलापुरात साकारतो आहे. वर्ल्ड स्पेस वीक २०२५ च्या औचित्याने, इस्रो (भारतीय अंतराळ संशोधन संस्था), बेंगळुरू यांच्या मार्गदर्शनाखाली आणि वालचंद इन्स्टिट्यूट ऑफ टेक्नॉलॉजी (डब्ल्यू.आय.टी.), सोलापूर यांच्या सहकार्याने ६ ऑक्टोबर २०२५ रोजी इस्रो प्रदर्शन व विविध स्पर्धांचे आयोजन करण्यात आले आहे. हा कार्यक्रम डब्ल्यू.आय.टी.च्या सिव्हिल-मेकेनिकल इमारतीतील प्रशस्त कॉन्फरन्स हॉलमध्ये सकाळी ९.०० ते संध्याकाळी ५.०० या वेळेत होणार आहे.

भारतीय अंतराळ संशोधन संस्थेचा हा उपक्रम ग्रामीण व शहरी विद्यार्थ्यांसाठी विज्ञान-तंत्रज्ञानाचे नवे दालन उघडणारा ठरणार आहे. उद्याचे शास्त्रज्ञ, अंतराळवीर व संशोधक घडविण्यासाठी ही पर्वणी प्रेरणादायी ठरेल, असा विश्वास आयोजकांनी व्यक्त केला आहे.
या प्रदर्शनात इस्रोतर्फे तयार केलेली खऱ्या स्वरूपातील रॉकेट्स, उपग्रह व अंतराळ यानांची मॉडेल्स विद्यार्थ्यांसह नागरिकांसाठी पाहण्यास उपलब्ध असतील. अंतराळ मोहिमांची माहिती, प्रयोग आणि अत्याधुनिक तंत्रज्ञानाची झलक या माध्यमातून प्रत्येक पाहुण्याला अनुभवता येणार आहे. शालेय विद्यार्थ्यांना अंतराळविज्ञानाची थेट ओळख मिळून संशोधनाची प्रेरणा घेण्याची ही सुवर्णसंधी ठरणार आहे.

८वी ते १०वीतील विद्यार्थ्यांसाठी विविध स्पर्धांचे आयोजन करण्यात आले असून, प्रत्येक शाळेतून २० विद्यार्थी व १ शिक्षक-समन्वयक सहभागी होऊ शकतील. या स्पर्धांमध्ये – प्रश्नमंजुषा : अंतराळ व विज्ञानविषयक ज्ञानाचा कस, मेमरी टेस्ट : निरीक्षण व स्मरणशक्तीची परीक्षा, पिक अँड स्पीक : सर्जनशील विचार व वक्तृत्वकौशल्याची चमक असा आकर्षक उपक्रमांचा समावेश आहे.

सर्व सहभागी शाळांना व प्राचार्यांना इस्रोतर्फे विशेष किट्स व गिफ्ट्स देण्यात येणार आहेत. विजेत्या विद्यार्थ्यांना थेट इस्रो, बेंगळुरू येथे भेट देण्याची अनमोल संधी मिळणार आहे. शाळांना १.५ तासांच्या स्लॉटनुसार प्रदर्शनाला भेट देण्याची सोय ठेवण्यात आली असून, २० पेक्षा अधिक विद्यार्थ्यांनाही सहभागी होता येणार आहे. सहभाग नोंदणीसाठी शाळांनी पुढील:https://forms.gle/BRxWkHTQNGnj41qF8 गुगल फॉर्म भरावा. “या उपक्रमातून विद्यार्थ्यांना विज्ञानाशी सुसंवाद साधण्याची, आकाशाला स्पर्श करण्याची आणि स्वप्नांना वास्तवात आणण्याची अप्रतिम संधी मिळणार आहे,” असे समन्वयक डॉ. विपुल कोंडेकर यांनी सांगितले.