चीन-पाकिस्तान सीमेवरील हालचालींवर असणार करडी नजर!
येस न्युज नेटवर्क : भारतीय लष्कराने चीन आणि पाकिस्तानच्या सीमेवर लक्ष ठेवण्यासाठी एका उपग्रहाचा प्रस्ताव ठेवला होता, त्याला संरक्षण मंत्रालयाने मंगळवारी मंजुरी दिली. संरक्षण मंत्रालयाने मोठी घोषणा करत भारतीय लष्करासाठी 4000 कोटी रुपयांच्या प्रस्तावाला मंजुरी दिली आहे. चीन आणि पाकिस्तानच्या सीमेवरील हालचालींवर लक्ष ठेवण्यासाठी या समर्पित उपग्रहाचा प्रस्ताव आहे. यामुळे लष्कराच्या क्षमतेत लक्षणीय वाढ होणार असल्याची माहिती लष्करी सुत्रांकडून सांगण्यात येत आहे.
भारतीय लष्कराच्या मेड इन इंडिया उपग्रहाच्या प्रस्तावाला मंगळवारी झालेल्या संरक्षण परिषदेच्या बैठकीत मंजुरी देण्यात आली. या उपग्रहामुळे सीमावर्ती भागात लष्कराची पाळत ठेवण्याची क्षमता आणखी मजबूत होणार आहे. सूत्रांनी सांगितले की, GSAT 7B उपग्रहाच्या प्रकल्पाचे काम भारतीय अंतराळ संशोधन संस्थाच्या भागीदारीत केले जाईल. भारतीय वायुसेना आणि नौदलाकडे आधीच समर्पित उपग्रह आहेत आणि या परवानगीनंतर लवकरच लष्कराकडेही हा उपग्रह असेल.
