सोलापूर – संत परंपरेचा गौरवशाली वारसा जपत सोलापुरातील वै.ह.भ.प. सद्गुरु बाजी अण्णा महाराज यांच्या कृपाशीर्वादाने १० ते १५ मे दरम्यान श्रीक्षेत्र सासवड येथे संत सोपानदेव महाराजांच्या पावन समाधी स्थळी अखंड हरिनाम सप्ताह व ग्रंथराज ज्ञानेश्वरी पारायण सोहळ्याचे आयोजन करण्यात आल्याची माहिती संयोजक नामदेव महाराज देवकते यांनी दिली. १० मे सोलापुरातील छत्रपती शिवाजी चौकातील बाजीअण्णा मठ येथून सप्ताहासाठी प्रस्थान होणार आहे.
या सप्ताहादरम्यान दररोज काकडा आरती, ज्ञानेश्वरी पारायण, तुकाराम गाथा भजन, हरिपाठ, न प्रवचन, हरिकीर्तन व हरिजागर असे विविध धार्मिक कार्यक्रम होणार आहेत. या सप्ताहात ह.भ.प. युवराजबुवा डोके महाराज, गोपाळ महाराज कुंभार, नामदेव महाराज देवकते, सुधाकर महाराज इंगळे, दादा महाराज गुंड, भागवत महाराज देवकते, लक्ष्मण महाराज गाडेकर, कल्याण महाराज जाधव, विशाल महाराज न मळगे, महेश महाराज सावंत, सुनील महाराज चव्हाण, विष्णू महाराज टेंभूकर आदी कीर्तनकार व प्रवचनकार यांची सेवा होणार आहे. तसेच तानाजी लवटे यांचे छत्रपती शिवाजी महाराज व किल्ले पुरंदर इतिहास या विषयावर विशेष मार्गदर्शन लाभणार असल्याचे कदेवकते महाराज यांनी सांगितले.
