TOP 25 । सोलापूरकरांवर गडकरी प्रसन्न…जेवढ्या केल्या मागण्या तेवढ्या मंजूर…!

केंद्रीय महामार्ग मंत्री नितीन गडकरी काल आणि आज सोलापूर जिल्ह्यात दौऱ्यावर आहेत. या दौऱ्यात त्यांनी हा आपल्या पक्षाचा तू दुसऱ्या पक्षाचा असा भेदभाव न करत ज्यांनी ज्या ज्या मागण्या मांडल्या त्या त्या जाहीरपणे मंजूर करून त्याला निधी देखील मंजूर केला. सोलापूर शहरातील रखडलेले दोनही उड्डाणपूल करण्यासाठी त्यांनी अखेरची संधी देत पाचशे कोटी रुपये वाढवून देत 1500 कोटी रुपयांचा निधी जाहीर केला. टेंभुर्णी करकम ते पंढरपूर हा नवीन महामार्ग करण्यासाठी त्यांनी साडेनऊशे कोटी रुपयांचा निधी जाहीर केला. सोलापूर शहरातील जुना पुणे नाका ते बोरामणी नाका यासाठी 1020 कोटींचा निधी, तसेच सुरत चेन्नई पार्ट मधील अहिल्यानगर सोलापूर ते कर्नाटक बॉर्डर पर्यंत च्या रस्त्यासाठी दहा हजार कोटी रुपयांचा निधी मंजूर केला. मोहोळ ते वळसंग बायपास, पंढरपूर शहरातील रिंग रोड, वागदरी ते अक्कलकोट, अक्कलकोट ते गाणगापूर, सोलापूर शहरासाठी साडेपाचशे कोटी रुपये खर्चून 33 किलोमीटरचा रिंग रोड असे दोन डझनाहून अधिक रस्ते त्यांनी मंजूर केले. येत्या तीन वर्षात आजवर केलेल्या एकूण एक लाख कोटी रुपयांचे रस्त्यांचे प्रकल्प पूर्ण होतील आणि सोलापूर जिल्ह्याचा कायापालट होईल असा शब्द देखील गडकरी यांनी दिला. एकूणच नितीन गडकरी सोलापूर जिल्ह्यावर प्रसन्न झाल्याचे दिसून आले.