सोलापुरातील डिजिटल फलक, गुलाल उधळणारी यंत्रे पोलीस आयुक्तांच्या रडारवर…!

सोलापूर शहरात गणेशोत्सव कालावधीमध्ये अनेक मंडळांनी फुकटात फलकबाजी करून विविध यंत्रांचा वापर करून हवेत गॅस द्वारे गुलाल उधळला.. शिवाय रंगीबेरंगी प्लास्टिक तुकडे उडवून जल्लोष साजरा केला. गणेशोत्सवामध्ये पोलिसांनी हतबलता दाखवली मात्र याची गंभीर दखल आता सोलापूर शहर पोलीस आयुक्त एम राजकुमार यांनी घेतली आहे. नवरात्र उत्सव, धम्मचक्र प्रवर्तन दिन आणि राष्ट्रीय स्वयंसेवक संघाचे पथसंचलन या पार्श्वभूमीवर पोलीस आयुक्तांनी शांतता कमिटी सदस्यांची तसेच विविध मंडळांची आणि पदाधिकाऱ्यांची बैठक घेतली. यावेळी अनेकांची मते जाणून घेतली. नवरात्र उत्सवात डीजेवर बंदी असून विनापरवाना जे बॅनर उभारले जातील त्यांची चौकशी करून त्यांच्यावर कायदेशीर कारवाई करण्याचा इशारा पोलीस आयुक्तांनी दिला आहे. कायदा हातात घेण्याचा प्रयत्न करू नका.. विविध यंत्रांचा वापर करून गुलाल हवेत उधळू नका.. शहरात कचरा करू नका असे आदेश देखील आयुक्तांनी या बैठकीत दिले. त्यामुळे शहरातील फुकट लावले जाणारे बॅनर बंद होतील आणि हवेतील प्रदूषण देखील कमी होईल हे आता नवरात्र उत्सवात पाहता येणार आहे.