सोलापूर : सोलापूर महानगरपालिकेच्या प्रभाग क्रमांक २४ मधील भारतीय जनता पार्टीचे नगरसेवक मधुसूदन दिनेश जंगम (वय ५२) यांचे अल्पशा आजाराने निधन झाले. त्यांच्या निधनाने भाजपसह सोलापूरच्या राजकीय आणि महापालिका वर्तुळात शोककळा पसरली आहे.
मधुसूदन जंगम हे प्रभाग क्रमांक २४ मधून अनुसूचित जाती प्रवर्गातून भाजपच्या तिकिटावर निवडून आले होते. प्रभागातील विविध विकासकामे आणि नागरिकांशी असलेल्या दांडग्या जनसंपर्कामुळे ते परिचित होते.
त्यांची अंत्ययात्रा शुक्रवारी दुपारी दत्तानगर, कुमठेकर हॉस्पिटलशेजारी, जुळे सोलापूर येथील त्यांच्या राहत्या घरातून निघणार आहे. त्यांच्या पश्चात पत्नी, एक मुलगा आणि एक मुलगी असा परिवार आहे.
