येस न्युज मराठी नेटवर्क : पर्यावरण विभागा, महाराष्ट्र शासनाने जाहीर केलेल्या माझी वसुंधरा अभियान व राष्ट्रीय स्वच्छ वायु उपक्रम अंतर्गत पर्यावरण विभाग, सोलापूर महानगरपालिका व सायकलिस्ट फाऊंडेशन तर्फे आयोजित माझी वसुंधरा सायकल राईड व स्वच्छता अभियानाचे आयोजन करण्यात आले होते.सदर राईडचे उदघाटन आमदार प्रणिती शिंदे, महापौर श्रीकांचना यन्नम, पालिकेचे आयुक्त पी शिवशंकर यांच्या हस्ते तर उपायुक्त धनराज पांडे, सहा. आयुक्त विक्रमसिंह पाटील, सायकलिस्ट फाउंडेशन चे अध्यक्ष सारंग तारे, अभियंता तपन डंके, किशोर सातपुते, लेखाधिकारी विष्णू गाडे यांच्या प्रमुख उपस्थिती करण्यात आले.या रॅलीमध्ये सोलापूर मधील विविध क्षेत्रातील मान्यवरांनी सहभाग नोंदवला.सदर रॅलीमध्ये सायकलस्वारांनी सात रस्ता- भैया चौक- संभाजी पुतळा-डफरीन चौक- होम मैदान या मार्गावर सायकलिंग करून सोलापूरकरांचे प्रबोधन केले.
राईडची सांगता होम मैदानाची स्वच्छता करून झाली यावेळी सोलापूर महानगरपालिका तर्फे लोकसहभागातून सुरू असलेल्या चळवळीची माहिती देऊन महानगरपालिकेला जास्तीत जास्त झाडे देऊन सोलापूरकरांनी सहकार्य करावे आणि नियोजनबद्ध कचरा व्यवस्थापन ही काळाची गरज असल्याचे पालिकेचे आयुक्त पी शिवशंकर यांनी नमूद केले.सदर वेळी मॉर्निंग वॉकला आलेले माजी केंद्रीय गृहमंत्री सुशिलकुमार शिंदे यांनी सर्वांना आरोग्याचे महत्व सांगून स्वतःचे आणि शहराचे आरोग्य चांगले ठेवणे काळाची गरज असल्याने महापालिकेने वेळोवेळी नागरिकांच्या आरोग्याचा दृष्टीने आवश्यक उपक्रम राबविण्यात यावे असे सुचविले. यावेळी नगरसेवक चेतन नरोटे, रियाज खरादी, मुख्य सफाई अधीक्षक नागनाथ बिराजदार व मुख्य आरोग्य निरीक्षक अनवर शेख, सतिश पाटील यांची विशेष उपस्थिती होती. कार्यक्रमाचा समारोप सहभाग प्रमाणपत्र देऊन करण्यात आला. सदर कार्यक्रम यशस्वी करण्यासाठी श्री. रजनीकांत जाधव, श्री. अभिषेक दुलंगे, श्री. विजय क्षीरसागर, महानगरपालिकेकडील पर्यावरण विभाग व कर्मचारी यांनी विशेष परिश्रम घेतले.कार्यक्रमाचे आभार सायकलिस्ट फाऊंडेशन चे सचिव भाऊराव भोसले यांनी केले.
