नवीन गणपती मंदिर बांधून देण्याची ग्रामस्थांची मागणी
मोडनिंब सह परिसरासाठी सुमारे १२ कोटी रुपयांची जलजीवन मिशन योजना राबविण्यात येत आहे. कासव गतीने सुरू असलेल्या या योजनेचे काम कधी चालू कधी बंद असते हे कळतच नाही. गेल्या दोन वर्षापासून मोडनिंब च्या दत्तनगर मधील गणपती मंदिरात नजीक या योजनेचे लाखो रुपयांचे प्लास्टिकचे गुंडाळून ठेवलेले पाईप धुळखात पडले होते. आज दुपारनंतर अचानक या पाइपांना आग लागली. प्लास्टिकचे पाईप असल्यामुळे आगीने मोठे रौद्ररूप घेतले. या घटनेत गणपती मंदिर भक्षस्थानी सापडले. गणपती मंदिराच्या गाभाऱ्यासह मंदिराचा सभामंडप आगीच्या भक्षस्थानी भक्षस्थानी सापडल्याने मोठे नुकसान झाले आहे. या घटनेमुळे ग्रामस्थांनी जल जीवन मिशन च्या अधिकाऱ्यांचा तीव्र शब्दात निषेध केला आहे. सुदैवाने या घटनेत कोणतीही जीवित हानी नाही.
आगीचे लोट आकाशात उंच दिसत असल्यामुळे ही घटना गावभर पसरली हजारो ग्रामस्थांनी काय झाले म्हणून गर्दी केली होती. या घटनेमुळे संपूर्ण गणपती मंदिराचा कलर काळा झाला आहे.
जल जीवन मिशनचे ठेकेदार आणि अधिकारी यांनाही घटना समजतात त्यांनी घटनास्थळी धाव घेतली. यावेळी उपस्थित पदाधिकारी आणि ग्रामस्थांनी झालेला घटनेचा निषेध म्हणून अधिकारी व ठेकेदार यांच्यावर तोंड सुख घेतले. तीव्र शब्दात निषेध व्यक्त करत मंदिर नवीन बांधून देण्याची मागणी केली. संबंधित ठेकेदारावर गुन्हा दाखल करावा अशी मागणी माजी सरपंच कुरण गिड्डे यांनी केली आहे.
गावकऱ्यांनी वर्गणी गोळा करून गणपती मंदिर बांधले आहे ते पूर्णपणे नवीन बांधून देण्यात यावे अशी मागणी यावेळी दत्तनगर येथील रहिवासी आणि ग्रामपंचायत सदस्य दत्तात्रय सुर्वे यांनी केली आहे. या घटनेबाबत त्यांनी दुःख व्यक्त केले आहे.
पंचायत समिती सदस्य प्रतिनिधी बालाजी पाटील यांनी ही घटना माढा तालुका पंचायत समितीचे सभापती पंडित देशमुख यांना कळवली. कोणत्याही परिस्थितीत मंदिर नवीन बांधून द्यावे अशी मागणी यावेळी सभापती देशमुख यांनी संबंधित अधिकारी आणि ठेकेदार यांच्याकडे फोनवरून बोलताना केली. आग लावली का आग लागली हे मात्र अद्याप समजू शकले नाही. या प्रकारात गावात उलट सुलट चर्चा ऐकावयास मिळत आहे.वरिष्ठांना ही घटना कळवून मंदिर नवीन बांधण्यासंदर्भात प्रयत्न करू अशी माहिती यावेळी उपस्थित अधिकारी आणि ठेकेदार यांनी ग्रामस्थांशी बोलताना दिली.
