सोलापूर- राष्ट्रीय खाद्यतेल अभियान–तेलबिया (NMEO-OS) अंतर्गत सन 2026-27 साठी महाराष्ट्र शासनाच्या कृषी विभागाने नवीन कार्यकारी मार्गदर्शक सूचना निर्गमित केल्या आहेत. या अभियानांतर्गत तेलबिया उत्पादन वाढविण्यासोबतच काढणीपश्चात होणारे नुकसान कमी करून शेतमालाला मूल्यवर्धन व स्थानिक स्तरावर बाजारपेठ उपलब्ध करून देण्यासाठी विविध घटकांमध्ये आर्थिक सहाय्य देण्यात येणार आहे. यासाठी इच्छुक पात्र लाभार्थ्यांनी अर्ज करावेत, असे आवाहन जिल्हा अधीक्षक कृषी अधिकारी शुकाचार्य भोसले यांनी केले आहे.
काढणीपश्चात पायाभूत सुविधा
तेलबियांची काढणी, संकलन व प्रक्रिया अधिक प्रभावी करण्यासाठी या घटकांतर्गत आर्थिक सहाय्य दिले जाणार आहे. तेलबियांची योग्य प्रकारे प्रक्रिया करून तेल काढण्याची क्षमता वाढविणे आणि स्थानिक पातळीवर शेतकऱ्यांना बाजारपेठ उपलब्ध करून देणे हा या घटकाचा उद्देश आहे.
या घटकासाठी वैयक्तिक शेतकरी, शेतकरी उत्पादक कंपन्या (FPOs), सहकारी संस्था, मूल्य साखळी भागीदार (VCPs) तसेच नवीन नोंदणीकृत तेल प्रक्रिया उद्योग पात्र आहेत. 10 टन प्रतिदिन क्षमतेच्या तेल काढणी युनिटसाठी यंत्रसामग्री व उपकरणांच्या प्रकल्प खर्चाच्या 33 टक्के किंवा कमाल 9 लाख 90 हजार रुपये, यापैकी जी रक्कम कमी असेल तेवढे अनुदान देण्यात येणार आहे.
इच्छुक लाभार्थ्यांनी तालुका किंवा जिल्हास्तरावर ऑफलाईन अर्ज सादर करावेत. अर्ज करण्याची अंतिम मुदत 31 ऑगस्ट 2026 आहे. सोलापूर जिल्ह्यासाठी एक युनिटचे उद्दिष्ट निश्चित करण्यात आले आहे. उद्दिष्टाच्या अधीन राहून जिल्हा तेलबिया अभियान समिती (DOSM) किंवा जिल्हा कार्यकारी समिती (DEC) मार्फत अर्जांची छाननी करण्यात येईल. त्यानंतर तांत्रिक मूल्यांकन करून पात्र अर्जांना मंजुरी देण्यात येईल.
फ्लेक्झी घटक
फ्लेक्झी घटकांतर्गत मिनी ऑइल मिल/एक्सपेलर युनिटसाठी फिल्टर प्रेससह प्रति युनिट कमाल 4 लाख रुपये, तर फिल्टर प्रेसशिवाय प्रति युनिट कमाल 3 लाख रुपये अनुदान देण्यात येणार आहे. या अनुदानाची मर्यादा अनुसूचित जाती/जमाती, अल्पभूधारक व महिला लाभार्थ्यांसाठी 50 टक्के, तर सर्वसाधारण प्रवर्गासाठी 40 टक्के आहे.
फ्लेक्झी घटकासाठी अर्ज महाडीबीटी (MahaDBT) पोर्टलवर ऑनलाइन पद्धतीने करावयाचे आहेत. इच्छुक पात्र लाभार्थ्यांनी अधिक माहितीसाठी संबंधित जिल्हा अधीक्षक कृषी अधिकारी किंवा तालुका कृषी अधिकारी कार्यालयाशी संपर्क साधावा.
