मनोज देवकर यांच्या सतर्कतेमुळे संशयित रंगेहात पकडला; उपमहापौर ज्ञानेश्वरी देवकर यांच्या हस्तक्षेपानंतर पोलिसांची तातडीने कारवाई
सोलापूर- सोलापूर महानगरपालिकेच्या दाराशा रुग्णालय परिसरात भरदिवसा सोलर पॅनल, त्यासोबतचा पोल व संबंधित साहित्य चोरी करण्याचा धक्कादायक प्रयत्न उधळून लावण्यात आला. सामाजिक कार्यकर्ते व पर्यावरणप्रेमी मनोज देवकर यांच्या प्रसंगावधानामुळे संशयिताला रंगेहात पकडण्यात आले असून त्याला सदर बझार पोलिसांच्या ताब्यात देण्यात आले.
मिळालेल्या माहितीनुसार, एका गरजू रुग्णाच्या मदतीसाठी दाराशा रुग्णालयात गेलेल्या मनोज देवकर यांच्या निदर्शनास रुग्णालयाच्या प्रवेशद्वाराजवळ बसविण्यात आलेले सोलर पॅनल, लोखंडी पोल व इतर साहित्य उपसून एक व्यक्ती घेऊन जात असल्याचे आले. हॉस्पिटलमध्ये डॉक्टर नव्हते व तेथील मेट्रो संगीताताई गुरव या उपस्थित होते त्यांनी तत्काळ सुरक्षा रक्षक व रुग्णालयातील कर्मचाऱ्यांच्या मदतीने संबंधित व्यक्तीला पकडून पोलिसांच्या स्वाधीन केले.
घटनेची माहिती मिळताच उपमहापौर ज्ञानेश्वरी महेश देवकर यांनी तातडीने दखल घेत संबंधित पोलीस अधिकाऱ्यांशी संपर्क साधून कठोर कारवाई करण्याच्या सूचना दिल्या. त्यानंतर पोलिसांनी घटनास्थळी धाव घेत पंचनामा करून पुढील तपास सुरू केला.
यावेळी प्रा. विजय लोंढे व मनोज देवकर यांनी सांगितले की, वीजपुरवठा खंडित झाल्यास रुग्णालयाच्या प्रवेशद्वारावरील उच्च क्षमतेच्या फोकस लाईटसाठी हे सोलर पॅनल वापरले जाते. सार्वजनिक उपयोगाच्या महत्त्वाच्या सुविधेची भरदिवसा चोरी करण्याचा प्रयत्न झाल्याने नागरिकांनी तीव्र संताप व्यक्त केला आहे.
या प्रकरणी पोलिसांकडून सखोल तपास सुरू असून, संबंधित संशयिताने यापूर्वीही अशा प्रकारच्या चोरीच्या घटना केल्या आहेत का, याची चौकशी केली जात आहे. सार्वजनिक मालमत्तेच्या सुरक्षेसाठी रुग्णालय परिसरात अधिक कडक सुरक्षा व्यवस्था करण्याची मागणी नागरिकांकडून होत आहे.
