सोलापूर, दि. २१ जून : भारतीय संस्कृतीचे महत्त्वपूर्ण अंग असलेल्या योगाचा प्रचार व प्रसार जागतिक स्तरावर व्हावा या उद्देशाने दरवर्षी जागतिक योग दिन मोठ्या उत्साहात साजरा केला जातो. याच अनुषंगाने निमा सोलापूर शाखेच्या वतीने श्री सरस्वती मंदिर संस्था संचलित सखुबाई हिराचंद नेमचंद प्रशाला, सोलापूर येथे जागतिक योग दिन उत्साहात साजरा करण्यात आला.
या कार्यक्रमात योगशिक्षक क्रांतिवीर महिंद्रकर व योगशिक्षिका डॉ. रेणुका शिरगोड यांनी विद्यार्थ्यांसह उपस्थित पदाधिकारी व शिक्षकांना विविध योगासनांचे प्रात्यक्षिक करून दाखविले. तसेच नियमित योगाभ्यासामुळे शारीरिक, मानसिक व बौद्धिक आरोग्य कसे सुदृढ राहते याबाबत मार्गदर्शन केले.
योग हा निरोगी जीवनशैलीचा पाया असून विद्यार्थ्यांनी दैनंदिन जीवनात योगाचा समावेश करावा, असे आवाहन प्रशालेच्या मुख्याध्यापिका नीता येरमाळकर
यांनी केले.
अष्टांग योग हे आयुर्वेदाचे महत्त्वाचे अंग असून त्यायोगे आजाराला प्रतिबंध होऊन निरामय आयुष्य लाभते. त्यामुळे वर्षातून एक दिवस नाही तर नियमित योगाभ्यास केला पाहिजे असे मत निमाचे माजी राष्ट्रीय अध्यक्ष डॉ. विनायक टेंभूर्णीकर यांनी व्यक्त केले.
कार्यक्रमाचे सूत्रसंचलन विद्या माने यांनी तर आभार प्रदर्शन मुकुंद गिरी यांनी केले. कार्यक्रमास संस्थेचे अध्यक्ष पांडुरंग देशमुख , रघुनाथ दामले , प्रशांत बडवे यांचेसह निमा सोलापूर शाखेचे अध्यक्ष डॉ. नागनाथ जिड्डीमनी , डॉ. रवी गायकवाड, डॉ. प्रवीण ननवरे , डॉ. सचिन बोंगरगे, डॉ. श्रुती मराठे, डॉ. पल्लवी भांगे, डॉ. अश्विनी देगावकर, डॉ. राजश्री मठ तसेच शाळेचे शिक्षक, विद्यार्थी उपस्थित होते.
