सोलापूर येथील रोटरी नॉर्थ राधाकिशन फोमरा मूकबधिर शाळेत नव्या शैक्षणिक वर्षाच्या प्रारंभी विद्यार्थ्यांचे उत्साहपूर्ण आणि जंगी स्वागत करण्यात आले. सोमवार, दि. १५ जून रोजी शाळेच्या पहिल्या दिवशी आयोजित करण्यात आलेल्या या स्वागत कार्यक्रमात विद्यार्थ्यांमध्ये आनंदाचे आणि उत्साहाचे वातावरण निर्माण झाले होते.
शाळेत दाखल झालेल्या विद्यार्थ्यांचे स्वागत विविध उपक्रमांच्या माध्यमातून करण्यात आले. यावेळी विद्यार्थ्यांना खाऊ, वह्या, पुस्तके तसेच इतर आवश्यक शैक्षणिक साहित्याचे वितरण करण्यात आले. या साहित्य वितरण कार्यक्रमाचा विद्यार्थ्यांना मोठा लाभ झाला. कार्यक्रमाच्या सुरुवातीला उपस्थित मान्यवरांच्या हस्ते विद्यार्थ्यांना साहित्याचे वाटप करण्यात आले.
या कार्यक्रमाला शाळेचे सचिव सुनील दावडा, खजिनदार राजगोपाल झंवर, मुख्याध्यापिका क्षितिजा गाताडे तसेच शाळेतील सर्व शिक्षक उपस्थित होते. सचिव सुनील दावडा यांनी विद्यार्थ्यांना नव्या शैक्षणिक वर्षासाठी शुभेच्छा देताना नियमित अभ्यास, शिस्त आणि आत्मविश्वास यांच्या माध्यमातून यश संपादन करण्याचे आवाहन केले. त्यांनी विद्यार्थ्यांच्या सर्वांगीण विकासासाठी शाळा कटिबद्ध असल्याचे सांगितले. तसेच रोटरी क्लब ऑफ सोलापूर नॉर्थ शाळेच्या विकासा करीता सदैव तत्पर राहील असे आश्वासन दिले.
खजिनदार राजगोपाल झंवर यांनीही विद्यार्थ्यांना मार्गदर्शन करताना शिक्षणाचे महत्त्व अधोरेखित केले. त्यांनी विद्यार्थ्यांनी आपल्या क्षमतांवर विश्वास ठेवून सातत्याने प्रगती साधावी, असे सांगितले. मुख्याध्यापिका क्षितिजा गाताडे यांनी विद्यार्थ्यांचे स्वागत करून कार्यक्रमाच्या शेवटी त्यांनी उपस्थित सर्व मान्यवर, शिक्षक आणि कर्मचाऱ्यांचे आभार मानले.
या प्रसंगी शाळेतील शिक्षिका संध्या चंदनशिवे, रेणुका पसपूले, विजया पिटाळकर, योगिता बोधले तसेच शिक्षक आनंद पारेकर, विठ्ठल सातपूते, अजित पाटील, ठाकर, बसाटे, दिनेश ताटे, बेनुरे, थोरात, पवार आदी उपस्थित होते. सर्व शिक्षकांनी विद्यार्थ्यांचे उत्साहाने स्वागत करून त्यांना नवीन शैक्षणिक वर्षासाठी प्रेरणा दिली.
या जंगी स्वागत समारंभामुळे विद्यार्थ्यांमध्ये आनंदाचे वातावरण निर्माण झाले असून नव्या शैक्षणिक वर्षाची सुरुवात उत्साहपूर्ण आणि प्रेरणादायी वातावरणात झाली.
