विधान परिषदेसाठी माजी आमदार राजेंद्र राऊत फिक्स…!

सोलापूर स्थानिक स्वराज्य संस्था मतदारसंघातून भाजपची उमेदवारी कोणाला मिळणार याचे सस्पेन्स 30 मे पर्यंत कायम राहणार आहे. भाजपकडून माजी आमदार प्रशांत परिचारक, माजी आमदार राजेंद्र राऊत, माजी आमदार दिलीप माने, माजी आमदार राजन पाटील यांचे चिरंजीव बाळराजे पाटील, आमदार सुभाष देशमुख यांचे पुत्र रोहन देशमुख, शहाजी पवार यांना उमेदवारी अर्ज भरण्याची तयारी ठेवा अशा सूचना देण्यात आले आहेत. सोमवारपासून उमेदवारी अर्ज भरण्याची प्रक्रिया सुरू होणार असून एक जून ही उमेदवारी अर्ज दाखल करण्याची अंतिम तारीख आहे. भाजपकडून मात्र 30 मे पर्यंत उमेदवारांची घोषणा केली जाणार नाही. बार्शीचे माजी आमदार राजेंद्र राऊत यांची उमेदवारी मुख्यमंत्र्यांनी फिक्स केली असल्याचे कळते. मात्र याबाबत गुप्तता पाळण्यात येत आहे. गेल्या महिन्यात मुख्यमंत्री बार्शीला आल्यानंतर त्यांनी राजाभाऊ यांचे कौतुक करत त्यांना भाजपमध्ये मोठे भविष्य आहे असे वक्तव्य केले होते. 1999 पासून राजा राऊत यांनी सहा वेळा विधानसभेच्या निवडणुका लढविल्या त्यामध्ये ते चार वेळा पराभूत झाले आणि दोन वेळा निवडून आले. दीड वर्षांपूर्वी झालेल्या निवडणुकीत ते दिलीप सोपल यांच्याकडून साडेसहा हजार मतांनी पराभूत झाले. बहुतांश इच्छुकांनी मुख्यमंत्र्यांची भेट घेतली असून प्रत्येकांनाच मुख्यमंत्र्यांनी शब्द दिला आहे. राऊत हे देखील दोन दिवसांपूर्वी मुख्यमंत्र्यांना भेटले. शिवाय ते पालकमंत्र्यांसमवेत एकत्र विमानाने आले . सोलापुरातील काही नगरसेवकांना राऊत यांनी फोन करून आपली उमेदवारी फिक्स झाली असल्याचे देखील सांगितले.त्यामुळे आता माजी आमदार राऊत यांचे विधान परिषदेच्या माध्यमातून राजकीय पुनर्वसन केले जाणार असल्याची चर्चा सुरू आहे.