सोलापुरातील रा.स्व संघाच्या तिसऱ्या संघ शिक्षा वर्गाला प्रारंभ
सोलापूर, ता.१५ :स्वयंसेवकाला समाजात काम करण्यासाठी तयार करणारा हा ‘प्रथम शिक्षा वर्ग’ महत्त्वाचा आहे. ही कार्यकर्त्यांसाठी एक वैचारिक पर्वणीच आहे. पहाटे ५ ते रात्री १० वाजेपर्यंत चालणाऱ्या विविध प्रकारच्या प्रशिक्षणातून कार्यकर्त्यांचा गुणात्मक विकास या वर्गात केला जातो. हा वर्ग म्हणजे देशाला परम वैभवाकडे नेणारा कार्यकर्ता घडविण्याचे ठिकाण आहे असे प्रतिपादन राष्ट्रीय स्वयंसेवक संघाचे पश्चिम महाराष्ट्र प्रांत सहकार्यवाह सचिन कुलकर्णी यांनी केले. राष्ट्रीय स्वयंसेवक संघाच्या पश्चिम महाराष्ट्र प्रांताच्या सोलापुरातील संघ शिक्षा वर्गाचा प्रारंभ हरिभाई देवकरण प्रशालेत शुक्रवारी झाला.
याप्रसंगी त्यांनी स्वयंसेवकांना संबोधित केले.याप्रसंगी व्यासपीठावर महापौर विनायक कोंड्याल, पश्चिम महाराष्ट्र प्रांताचे संघचालक सुरेश जाधव, या वर्गाचे सर्वाधिकारी कराडचे जिल्हा सहसंघचालक शशिकांत फिरंगेउपस्थित होते. भारत मातेच्या पूजनाने वर्गाचे उद्घाटन करण्यात आले.सचिन कुलकर्णी यांनी पुढे बोलताना संघाचे वैचारिक अधिष्ठान मजबूत असल्यानेच त्याची तुलना इतर कोणत्याही संघटनेशी होऊ शकत नाही, असे पूजनीय सरसंघचालक म्हणूनच म्हणतात असे सांगितले. संघ कोणत्याही जातीचा नसून, तो सर्व भारतीयांना संघटित करतो. घरात भांडे कोणतेही असले तरी त्यातील पाणी ‘हिंदुत्वाचेच’ आहे, इतक्या सोप्या भाषेत संघाचे स्वरूप स्पष्ट होते. या वर्गात शालेय, महाविद्यालयीन आणि व्यावसायिक अशा तीन वेगवेगळ्या श्रेणींतील कार्यकर्ते संघाच्या कार्यपद्धतीचा जवळून अभ्यास करतील. अखिल भारतीय स्तरावरील कार्यकर्ते त्यांच्या शंकांचे निरसन करून कार्यवृद्धीसाठी मार्गदर्शन करणार आहेत. संघशताब्दीसाठी कार्यकर्त्यांच्या पाच पिढ्या खर्ची पडल्या असून, आता सहावी पिढी हे वैचारिक अधिष्ठान पुढे नेण्यासाठी सरसावली आहे. या वैचारिक अधिष्ठानातूनच समाजात परिवर्तन घडवणारे कार्यकर्ते तयार होतील. त्यामुळे सर्व स्वयंसेवकांनी समाजाप्रती कर्तव्य भावना व सहजीवनाची सवय लावून घेत संघ कामाचा प्रभाव सर्वत्र वाढवण्याचा प्रण करावा, असे आवाहन सह प्रांत कार्यवाह सचिन कुलकर्णी यांनी केले.
महापौर विनायक कोंड्याल यांनी मनोगत व्यक्त करताना, संघ विचारांचा पहिल्यापासूनच माझ्यावर प्रभाव आहे. माझ्या वडिलांवरही संघाचा संघाप्रती माझ्या मनात नितांत आदर आहे. संघ विचार हा एक संस्कारच आहे. या वर्गाचा उद्घाटक म्हणून मला आमंत्रित केले हे मी माझे भाग्य समजतो. राष्ट्र प्रेमाचे संघाचे धोरण माझ्या मनाला भावले आहे. सोलापूरच्या सर्वांगीण विकासासाठी संघाचे मार्गदर्शन घेत राहणार.
मोबाईल विरहित वर्गसलग १५ दिवस चालणारा या वर्गात सर्व स्वयंसेवकांकडे मोबाईल नसणार आहे. या वर्गात पहाटे ५ वाजल्यापासून रात्री १०.३० पर्यंत, वेळेचे नियोजन, शारीरिक, बौद्धिक प्रशिक्षण यासोबतच सेवाव्रत, सामाजिक समरसता आदी बाबींचे प्रशिक्षण देण्यात येणार आहे.
