येस न्युज मराठी नेटवर्क : करोनाच्या थैमानामुळे हतबल झालेल्या अमेरिकन नागरिकांना आता मोठा दिलासा मिळणार आहे. अमेरिकन नागरिकांना घरच्या घरीच करोना चाचणी करता येणार आहे. विशेष म्हणजे या चाचणीचे निकाल ३० मिनिटात समजणार आहे. अमेरिकेच्या अन्न आणि औषध प्रशासनाने या चाचणी किटला मान्यता दिली आहे.
एकदाच वापरता येणारी ही चाचणी किट ल्युकिरी हेल्थने तयार केली आहे. आपात्कालीन स्थितीमध्ये याचा वापर करता येऊ शकतो. चाचणीसाठी नाकातील स्वॅब नमुना घेऊन ही चाचणी करता येऊ शकते. या किट वापर १४ वर्षावरील व्यक्ती करू शकतात, असे अमेरिकेच्या अन्न आणि औषध प्रशासनाने स्पष्ट केले आहे.
अमेरिकेत आरोग्य कर्मचारी घरी येऊन करोना चाचणी करू शकत होते. आता मात्र, स्वत:ला करोना चाचणी करता येऊ शकते. फक्त घरीच नव्हे तर रुग्णालयातही या किटचा वापर करता येणार आहे. १४ वर्षावरील व्यक्तिंची करोना चाचणी मात्र आरोग्य कर्मचाऱ्यालाच करावी लागणार असल्याचे अन्न आणि औषध प्रशासनाने आयुक्त स्टिफन हान यांनी म्हटले.
अमेरिकेत करोनाबाधितांची संख्या दिवसेंदिवस वाढत आहे. यामुळे आरोग्य व्यवस्थेवर मोठा ताण निर्माण झाला आहे. अमेरिकेत करोनाबाधितांची संख्या एक कोटींहून अधिक झाली आहे. तर, अडीच लाखांहून अधिक नागरिकांना प्राण गमवावे लागले आहेत. जगभरातील करोनाबाधितांची संख्या ५ कोटी ६० लाखांहून अधिक झाली आहे. तर, १३ लाखजणांना प्राण गमवावे लागले आहे.
