वीरपत्नी, वीरमाता आणि वीरकन्या यांची असणार उपस्थिती : जिजाऊंच्या वेशात सहभागी होण्याचे महामंडळाचे आवाहन !
सोलापूर – छत्रपती शिवाजी महाराज यांच्या जयंतीचे औचित्य साधून शिवजन्मोत्सव मध्यवर्ती महामंडळाच्यावतीने दरवर्षीप्रमाणे साजरा करण्यात येणाऱ्या शिवाजी महाराज पाळणा सोहळ्याची तयारी पूर्ण झाली असून यंदाही हा सोहळा मोठ्या दिमाखात पार पडणार आहे. बुधवार १८ फेब्रुवारी रोजी मध्यरात्री बरोबर ११ वाजता पाळणा सोहळ्याला सुरुवात होणार असल्याची माहिती मध्यवर्ती महामंडळाच्या पदाधिकाऱ्यांनी दिली.
यावर्षीच्या सोहळ्याचे वैशिष्ट्य म्हणजे देशासाठी सर्वोच्च बलिदान देताना धारातीर्थी पडलेल्या भारतीय सैन्यामधील सोलापूर शहरातील शहीद जवानांच्या वीरपत्नी, वीरमाता आणि वीरकन्या यांच्या हस्ते पाळणा सोहळा संपन्न होणार आहे. त्याचबरोबर मध्यवर्ती महामंडळाच्या आजी-माजी ट्रस्टींच्या धर्मपत्नी तसेच शिवकन्यांच्या उपस्थितीत हा सोहळा पार पडणार असल्याने कार्यक्रमाला विशेष भावनिक आणि प्रेरणादायी स्वरूप लाभणार आहे.
शहरातील महिला भगिनी मोठ्या उत्साहात पारंपरिक वेशभूषेत तसेच जिजाऊंच्या वेशात पाळणा सोहळ्यासाठी सहभागी होणार असून या सोहळ्यामुळे संपूर्ण परिसर शिवमय होणार आहे. महिलांच्या सुरक्षेचे विशेष नियोजन करण्यात आले असून त्यांच्या सुरक्षिततेच्या दृष्टीने पोलीस प्रशासन, स्वयंसेवक तसेच मध्यवर्ती महामंडळाच्या कार्यकर्त्यांची स्वतंत्र व्यवस्था करण्यात आली आहे.
शिवप्रेमी महिला भगिनींनी मोठ्या संख्येने उपस्थित राहून पाळणासोहळ्याचा आनंद घ्यावा, असे आवाहन शिवजन्मोत्सव मध्यवर्ती महामंडळाच्या वतीने करण्यात आले आहे. शहरातील शिवभक्तांसाठी हा सोहळा दरवर्षीप्रमाणेच प्रेरणादायी आणि अविस्मरणीय ठरणार असल्याचा विश्वास आयोजकांनी व्यक्त केला.
शिवभक्तांची लक्षवेधी उपस्थिती असणार
कार्यक्रम स्थळी मोठ्या प्रमाणात शिवभक्त उपस्थित राहण्याची शक्यता लक्षात घेऊन एलईडी स्क्रीनची व्यवस्था करण्यात आली आहे, जेणेकरून सर्वांना सोहळा प्रत्यक्ष पाहता येईल. आकर्षक सजावट, पारंपरिक ढोल-ताशांचा नाद आणि शिवभक्तांच्या जयघोषात हा पाळणा सोहळा अत्यंत दिमाखदार वातावरणात पार पडणार आहे.
यांची उपस्थिती असणार
- माजी ट्रस्टी अध्यक्ष कै. मुरलीधर घाडगे यांच्या पत्नी माजी उपमहापौर सुषमाताई घाडगे
- माजी ट्रस्टी सदस्य कै. अर्जुनराव सुरवसे यांच्या धर्मपत्नी यशोदाताई सुरवसे
- कै. धर्मा भोसले यांच्या धर्मपत्नी सीताबाई भोसले
- कौ. विजय फुटाणे यांच्या धर्मपत्नी लता फुटाणे
- ट्रस्टी सदस्य शिवाजीराव घाडगे यांच्या धर्मपत्नी सरोजनी घाडगे
- ट्रस्टी सदस्य दिलीप कोल्हे यांच्या धर्मपत्नी उपमहापौर मंगला कोल्हे
या वीर पत्नींचा असणार सहभाग
श्रीमती देवकी रत्नाकर हडपद, रेखा शौर्याप्पा नावी, सुषमा दत्तात्रय माने, रत्‍नाबाई बाबुराव चांदोडे.
या शिवकन्यांचा सहभाग
महाराष्ट्र लोकसेवा आयोग परीक्षा उत्तीर्ण होऊन यश मिळवणाऱ्या सोलापुरातील शिवकन्या संजीवनी ज्योतीराम भोजने, सरोजिनी ज्योतीराम भोजने, अमृता ब्रह्मदेव ननवरे यांचा देखील सहभाग पाळण्यासोळ्यासाठी असणार आहे.
